کولت. آذ علی‌آغا کورچایلی‌نین "یادینا دوشوره‌م‌می؟" آدلی شعیرینی تقدیم ائدیر

قالدی آرخادا آرتیق عؤمرون خوشبخت ایللری،
ایندی منیم الیمه دیمز سنین اللرین.
سؤیله هردن اسنده سویوق پاییز یئللری،
داغیلان‌دا اوزونه او پریشان تئللرین،
دئییرسنمی اولایدیق عشقین گنجلیک یازین‌دا؟
هئچ اولماسا خیالین دومانلی آیناسین‌دا
سنینله بیر آنلیغا گلیب گؤروشورم‌می؟
یادینا دوشورم‌می؟

سعادت فورصتینی قاچیرتدیق سن ده، من ده،
اونو کؤهله‌ن آت کیمی سالمالییدیق کمه‌ن‌ده،
هردن سئودا یولونو آزیب دومان‌دا، چن‌ده،
سنه اومید وئره‌جک بیر ایشیق گؤرمه‌یه‌ن‌ده
بلدچی اولورام‌می جیغیرلار آراسین‌دا؟
هئچ اولماسا خیالین دومان‌لی آیناسین‌دا
سنینله بیر آنلیغا گلیب گؤروشورم‌می؟
یادینا دوشورم‌می؟

گل ایندی خاطیرلایاق بوتون اولانلاری بیز،
اؤزوموز یازمالییکه‌ن حکمو بیز، قراری بیز،
طالعین اللرینه وئردیک ایختیاری بیز،
گناه کیم‌ده‌دیر گؤرن؟ من بیلمیرم! باری بیز
بیر نیشانه قویمادیق خاطره دونیاسین‌دا.
هئچ اولماسا خیالین دومان‌لی آیناسین‌دا
سنینله بیر آنلیغا گلیب گؤروشورم‌می؟
یادینا دوشورم‌می؟