Axar.az
یوخاری


بالامی‌ تاپماسام یولا دوشمه‌رم. من بالامی‌آختاریرام -حکایه‌

آنا صحیفه ادبیات
12 Punto 14 Punto 16 Punto 18 Punto

کولت. آذ محمد قاضي (م.سمندر) نین " آنا محبّتی" آدلی حکایه‌سینی تقدیم ائدیر:

چار­اویماغین « قیرخ بولاق » کندینده بؤیوک بیر گؤل وار. هر ایل یازین اوّللرینده مین­لر کؤچری اؤردک بو گؤله گلیب و پاییزین سون آیلارینا قدر بو گؤلون ماوی سولاریندا اوزوب و گزه­رلر. بو اؤردکلرین آدینا « قاشقالداق » دئیه­رلر. قاشقالداقلارین بدنلری قارا، آلینلاری آغ و آیاقلاری قیرمیزی­دیر. دوغرودان‌دا بو اؤردکلر چوخ گؤیچک و گؤزه‌لدیر. کندین قیز – اوغلانلاری یاز و یای گونلرینده بو اؤردکلرین تاماشاسینا دوروب و اونلارین تاماشاسیندان لذّت آپارارلار. پاییز گلنده، او زامان کی چمنلرین رنگی سارالیب، گوللر سولوب و بولبوللرین خوش سسلری باغلاردان کسیلر، «قاشقالداق»لار ­گؤلون قیراغینا ییغیشیب و آغیر بیر فیکره گئده­رلر… کؤچ فیکرینه: نه چتین اولور آیریلیق…

قیرخ بولاق گؤلوندن آیریلماق غصّه­سی قاشقالداق­لارین اوره­یینی سیخار، آیریلماغی اؤزلرینه بویوک غم – کدر حساب ائدر و بو غم- کدردن حزین- حزین آغلایارلار.

پاییزین سون گونلری­ایدی. سولار یاواش- یاواش دونوردولار. گؤیده­کی دورنالار قاتار- قاتار بغداد ائللرینه کؤچوردولر. قاشقالداق­لاردا مین حسرتله اؤزلرینی کؤچ اوچون حاضیرلاییردیلار.

قاشقالداق­لار سفره گئجه چیخارلار. آخشام قارانلیقلاشاندا اؤردکلرین باشچیسی گؤیه قالخیب و یولا دوشمه‌یی تکلیف ائتدی. « آرزی » آدلی بیر کؤرپه قاشقالداق اوزونو آناسینادوتوب دئدی:

– آنا یول منی یوراجاقدیرمی؟

– یوراجاقدیر بالام.- دئیه آنا جاواب وئردی.

– آنا یول بیزی آیاقدان سالاجاقدیرمی؟- دئیه آرزی یئنه ده سوروشدو.

– یول منیم گؤزه ل بالام! یول بیزی یورسادا آمما هئچ واخت آیاقدان سالابیلمز.- دئیه آنا جاواب وئردی.

اؤردکلر گؤزلرینده غم، اوزلرینده سئوینج قاناد چالیب قارانلیق گؤیلره یوکسلدیلر. دوزدور کی اونلار اؤز سئومه­لی گؤللریندن آیریلیردیلار لاکن « کرکوک » شهرینده ایستی گؤللر، آل الوان گوللر و گؤی چمنلر اونلاری گؤزله­ییردیلر. هله بیر آز یول گئتمیشدیلر کی، آنا اؤردک اوزونو یولداشلارینا توتوب دئدی:

منیم آرزیم‌هانی؟ سسی گلمیر.

بیریسی جاواب وئردی:

– بیز اونو اوچمامیشدان قاباق گؤردوک. لاکین ایندی گؤزوموزه دیمیر. آنا‌هامیدان سوراقلاشدی. آمما آرزی یوخ‌ایدی. کیمسه سوراغینی وئرمه­دی، سانکی آرزی بیر دامجی سو اولوب یئره باتمیشدی.

آنا دئدی:

– من قاییدیرام.

دئدیلر:

– گئتمه تاپا بیلمزسن…

آنا قاییتدی، اؤردکلر اؤز یوللارینا داوام وئردیلر. آنا قاشقالداق گؤلونون یانینا گلیب سسله ندی:

– آرزی! بالام…

بیر سس گلمه­دی. یورولموشدو. بیر داشین اوستونده اوتوردو. گئجه سکوتا دالمیشدی چاققال­لار اولویوردولار. آنا گؤلون هر طرفینه باش چکیب بالاسینی گزدی . آمما آرزی­دان بیر خبر چیخمادی. آنا سحرآچیلانا دک بالاسینی گزدی. آمما اوندان بیر نیشان تاپا بیلمه­دی.

سحر آچیلاندا، آنا اوزونو داغا توتوب یئنه قیشقیردی:

– آرزیم… بالام…

– داغدان بیر سس قوپدو:

– ب…الا…ب…الا.

آنا داغا ساری اوچدو. داغدا ایسه بیر نیشان یوخ ایدی. قیشین ایلک قاری یاغماغا باشلامیشدی. گؤل سس­سیزجه کؤکسونو گؤیدن دوشن قارلارین اوزونه آچیمیشدی… کیمسه گؤرونموردو. آنا یئنه ده بیر قارا داش اوستونده اوتوروب بالاسینی سسله­دی. یئنه ده داغلار اونا جاواب وئردی؛ گؤزلری یاشا دولدو اختیارسیز ایکی دامجی یاش میرواری کیمی‌گؤزلریندن آخدی. آنا سس­سیزجه آغلاماغا باشلادی. بو زامان بیر ساری دووشان اوردان کئچیردی. اؤرده­یی آغلایا- آغلایا گؤروب اونا یاخینلاشدی سالام وئریب سوروشدو:

– آنا، نییه آغلاییرسان؟

سن منیم آرزیمی‌گؤرمه‌دین؟- دئیه آنا سوروشدو.

– آنا ایتیرنی آختارمازلار. ایندی یولداشلارین اوزاقلاشار، سن تک قالیب هلاک اولارسان. دور گؤیه چیخ، ایندی یولداشلارینین گؤزلری یولدادیر.

– بالامی‌تاپماسام یولا دوشمه‌رم. من بالامی‌آختاریرام.

– قار چوخ یاغیب، شاختا سنی قوروداجاق، دور آیاغا یوخسا گئج اولار.

من بالاسیز نئجه گئدیم؟- دئیه آنا یئنه ده آرزی­نی آختارماغا باشلادی. دووشان گؤردو کی آنا گئتمیر. اوزونو آنایا ساری توتوب دئدی:

– او داغین اته­یینه بیر باخ!

آنا داغین اته­یینه ساری اوچدو. بیر تولکو یاتمیشدی. آنانی گؤرجک دیک دوروب قاچدی. آنا یاخینلاشاندا آغ- آپپاغ قارلارین اوستونده آرزی­نین قارا للک­لری- خینالی آیاقلاری و قانلی ککیلینی گؤردو.

تاریخ
2020.01.20 / 11:39
مولف
آینورا مممدووا
شرح لر
دیگر خبرلر

اوچ سوال، بیر جاواب... - مؤولانا

آلا قارغا ایله قارا قارغا دوست اولا بیلرمی؟ - حکایه

شئعرله بوی آتان فیدانلار

یاپیش اللریمدن، لاپدا زنجیر اول- شئیر

عشق‌سیز، ای دونیا، ندیر دیرین؟!- شعر

سوزمیی کیم‌دن اؤیرندین؟- شعر

بو کرونانی دا دییه‌سن قدرت کور ائله‌ییب، سانکی...- حکایه‌

آزاد بیر قوشدوم- شئیر- ویدئو

بیر لاله عذار اولماسا من نئیله یه بیللم - شعیر

عاشیقین غملی گؤروب نازایله جانان اوخوسون- غزل

خبر خطّی
 
Axar.az'da reklam Bağla
Reklam
Bize yazin Bağla