کولت. آذ اوشاق ادبیاتی سیلسیله‌سین‌دن شاعر هاشیم ترلانین "خوروز" آدلی شعرینی تقدیم ائدیر:

خوروز - خوروز جان خوروز

گؤزلری مرجان خوروز

قانادلاری قیرمیزی

قویروغو الوان خوروز

گاه دان آغ دون گئییرسن

اولورسان مستان خوروز

باشیندا آل تاجین وار

دیللرده دستان خوروز

قوق - قولو قو دیلینده

سسینده فرمان خوروز

هارای سالیرسان هردن

آچیلمامیش دان خوروز

یاتانلاری دبردیب

وئریرسن اذان خوروز

بعضن واخ سیز بانلاییب

وئرمیرسن آمان خوروز

باشقا خوروز گؤرنده

باشلانیر داوان خوروز

یارالانیرسان آخیر

شاققالیندان قان خوروز

هرنه اولسان قشنگ سن

گؤزلری مرجان خوروز