قادین، پنجره‌دن آپارتمانین قارشیسینداکی پارکا باخیب دوشونور. «گؤی قیزاریب‌هاا. قار یاغاجاق». کامپیوتر باشیندا اوتوران اوغلونا باخیب، دئییر: «یورولمادین؟!» اوغلان‌ باشینی مانیتوردان قالدیریب، هئچ بیر سؤز ائشیتمه‌میش ‌کیمی دونوق باخیش‌لارلا اونون اوزونه باخیر.

آناسی «گؤی قیزاریب، قار یاغاجاق» - دئینده، باجی‌لارییلا بیرلیکده پنجره‌نین قاباغینا قاچیب قارین یاغما‌سینی گؤزله¬یردیلر. قیزاران بولودلاردان قار یاغیب-یاغمامیش، بویون-بوغازلارینا بیر شال بورویوب، حَیطه قاچیب، قارتوپو اوینایار، زویولداق اوچاردیلار. قار آدامی دوزلدیب، اونو اؤز کهنه پالتارلارییلا گئییندیرردیلر. بارماق‌لاری دونسا دا، وئج‌لرینه آلمادان، قار آدامی دوزلیب باشا چاتمایینجا ائوه دؤنمزدیلر. بوتون قیش بویو، قار آدامی حیطین بیر بوجاغیندان گؤزتچی کیمی اونلارین گلیب-گئتمه‌سینی گود‌ردی.

بیر دؤنه پا‌لتاری‌نین ایکی دویمه‌سینی قوپاریپ اونلاری قار آدامینا گؤز کیمی یاراشدیراندا، آناسیندان اولمازین کؤتک یئمیشدی. گؤز یاش‌لاری یاناغیندا بوز باغلامیشدی. همن ایل، قار آدامی کور بیر گؤزتچی کیمی، حیطین بیر بوجاغیندا دونوب قالمیشدی!

پنجره‌نین قاباغیندان اوزاقلاشیب، حیات یولداشی‌نین یانیندا اوتوردو. «قار یاغاجاق! گؤی یامان قیزاریب» - دئییر.

کیشی، الینده¬کی قزئتی ائله دقّت‌له اوخویور کی، یانیندا بیری‌نین ایله¬شیب-ایلشمه¬دییینی باشا دوشمور؛ اوندا قالسین کی، سؤزلرینی ائشیتسین!

آیاغا دورور. یئنه پنجره‌یه یاخین‌لاشیب بولودلارا باخیر. اری‌نین الینده‌کی قزئتین خیشیلتیسی قولاق‌لارینی اینجیدیر. توز دسمالینی گؤتوروب، ائوین جا‌نینا دوشور. شوشه میزلری بلور کیمی پاریلدادیر. تلویزیونون توزونو آلیب شوشه‌سینده اؤز شکلینه باخیر.

شیشه تمیزله‌ییجینی یاتاق اوتاغینداکی گوزگویه فیسیلدادیر. دستمالی گوزگویه چکنده، بیر آن دایانیر. آغ چیچک کیمی گوزگویه یاغان قار دنه‌لری، ماوی شوشه تمیزله‌ین‌له بیر-بیرینه قاریشیر؛ سانکی آلاچرپوودور، قوپوب. دستمالی یئره آتیب، سئوینجله دئییر: «قار! اؤزو ده گؤر نئجه یاغیر!»

بیر ساعت، بلکه ده چوخ، پنجره‌نین اؤنوندن ترپنمه‌دن، آپارتمان قارشیسینداکی پارکا گؤز تیکیب. قار دایانمادان یاغیر. اوشاق‌لارین بیر نئچه‌سی، قاری اوووج‌لاریندا یومرولادیب بیر-بیری‌نین اوز-گؤزونه چیرپیرلار. بیر-ایکیسی ده زویولداق اوچور.

تنه‌بی‌ده اویان-بویانا گئدیر. حیات یولداشی‌نین اؤنونه سریلن قزئتی آیاقلاییر. قزئت خیشیلداییر. یولداشی باشینی قالدیریب؛ آیاق‌لارینا بئله باخمیر.

بئینینده بیر فکر قیمیلداییر، آنجاق اؤز یاشینی، بیر ده دن دوشموش ساچ‌لارینی دوشونور. گوزگویه باخیب، آغارمیش ساچ‌لارینا ال چکیر. گؤزلرینه گولور. اختیارسیز حرکته گلیر. پالتار ایشقافینا ساری گئدیر. گئیینیر. الجک‌لرینی گؤتورور. بویون-بوغازینا قالین بیر شال بورویور.
ائودن چیخاندا حیات یولداشی‌نین «هارا گئدیرسن؟» - سؤالینا جواب وئرمه‌دن، قاپینی اؤرتور.

الجک‌لرینی گئیه-گئیه پارکداکی اوشاق‌لارین گولوشونه قوشولور. بیر-ایکی قار توپو اوزونه، باشینا دَییر. اوووج‌لارینی قارلا دولدوروب، اوشاق‌لارا ساری قاچیر.

آپارتمانین پنجره‌لرینه باخدیقدا، حیات‌ یولداشییلا اوغلو، بیر ده پنجره آرخاسیندان باخان قونشولار، جانسیز بیر هیکل کیمی گؤرونورلر.