کولت. آذ رسول رضانین "ارک قالاسی- تبریز- گؤزل شهر!" آدلی شعرینی تقدیم ائدیر:

ووروش‌دولار:

سون گولله‌یه،

سون سونگویه،

سون قونداغا قدر.

ووروش‌دولار:

هر شئی قیرمیزی گئیدی،

داش‌دان تورپاغا قدر.

ووروش‌دولار:

آلت دوداق‌دان

اوست دوداغا قالخا بیلمه‌ین

سسه قدر.

ووروش‌دولار:

اونلاردان یئددی دفعه -یئتمیش قات

آرتیق اولان،

سونگولری نارین داراق دیشی کیمی

سیخ اولان دوشمن‌له.

یارالیلار اوفول‌دامادی.

جان وئره‌نلر اینله‌مه‌دی،

سوسوزلار «یاندیم» دئمه‌دی.

اؤپدو قوروموش دوداقلاری

قان هوپموش تورپاغی.

یارالارینا باسدیلار

قان رنگ‌لی بایراغی.

نه دوشمه‌ن اونلاردان

بیر آمان سؤزو آلا بیلدی،

نه بو اؤلومو یاغی دوی‌دو،

نه قالا بیل‌دی.

سؤیکنیب قالا دیوارینا

اؤلدولر آیاق اوسته،

چیین-چیینه،

اولدوزلار شاهید اولدو

بیر سیرادا دایانمیش

اؤلولرین قاباغین‌دان

یوز یئره بؤلونموش دیریلرین

چکیلدیینه.

اؤلدولر آیاقلارینین آلتین‌دا

وطن تورپاغی.

باشلارینین اوستون‌ده

وطن اولدوزلاری.

کؤنول‌دن-کؤنوله کئچدی

اومیدلری، آرزولاری.

گئجه آغیر- آغیر کئچدی

جنازه‌لرین اوستون‌دن:

کئچ‌دی گئت‌دی یولو سحره.

گونش شفق‌دن بیر اؤرتوک چکدی

تورپاغی قورویوب، تورپاق‌دا دینجه‌لن

جنازه‌لره.