آنا صحیفه ادبیات |
یازار: غلامحسین ساعدی
چئویرن: ائیواز طاها
کوچهنين باشيندا يئرلشن بير تئلئفون كؤشكونون [بوتکا ] قاباغيندا جاماعات صف باغلاييب. هاوا سوْيوقدور. ياغيش ياغير. دؤزومسوز آداملار گؤزلرينی كؤشكون ايچينه زيللهييبلر. دستهيی الينه آلميش كيشی، تئلئفونلا دانيشير.
توْختاقدير، كيمسهنی وئجينه آلمير. گولور، اوغونوب كئچير. بير گيله سيگارئت چيخارير، آليشديريب يئنهده دانيشيغا قيزيشير. ائشيكدهكی آداملار تلهسيرلر، سينيرلری گرگيندير. دئيينيرلر. صبری توٍكنميش بيريسی سيرادان چيخاراق كوچهدن كئچيب، گئجهنین قارانليغيندا ايتير. بير-ايكی تلهسگن آدام دا سيرادان چيخماغی دوشونور، سوْنرا نهايسه فيكيرلريندن داشينيرلار. سيرانين باشيندا دورموش كيشی كؤشكون قاپيسينی دؤيور. كؤشكدهكی آدام قاش-قاباغينی ساللاياراق تلسمهمهلرينی آنلادير. هامینين اعتيراض سسی اوجالير. آمما كؤشكدهكی كيشی تئز-تئز دانيشير. گوله-گوله دستهيی قوْيور. تئلئفون دفتريني گؤتوروب، كؤشكدن چيخير. سئوينجيندن دريسينه سيغمير. جاماعات آجيقلی باخيشلارلا اوْنو سوزور، آستاجا سؤيورلر. اوْ ايسه سايماز آدديملارلا قارانليقدا ايتير.
ايكينجی نفر تئلئفون كؤشكونه گيرير. يامان آجيقلانيب. دستهيی قالديراركن گؤزو اينديجه قارانليقدا ايتميش آدامين كؤلگهسينی آختارير. تئلئفون دفترينی چيخاريب، واراقلايير. بير سكّه سالير، نؤمرهلری ييغير. دانيشماغا باشلاديقدا سيرـ صيفتی آچيلير. كراواتینين دويونونو بوْشالدير. دانيشير، دانيشير، يئنه ده دانيشير. اييلير، دوزهلیر. اوْ بيري آدام شوشهنی دؤيور. كؤشكون ايچيندهكی كيشی اوْنو سايمير. ديشارداکی كيشی يئنه ده شوشهنی دؤيور. ايچهريدهكی كيشی اوزونو تورشودوب، دؤزوملو اوْلمالارينا ايشاره ائدير. يئنه ده دانيشير، اورهكدن گولور. دستهيی قوْيور. كاغيذ-كوغوذونو ييغيشديرير، كراواتینين دوٍيونونو بركيديب، كؤشكدن چيخير. هامی نيفرتله اوْنا باخير. او دا كيمسهنی سايمادان يوْل آلير، قارانليقدا ايتير.
سونراكی آدام كؤشكه گيرهر-گيرمز آجيقلا قاپینی باغلايير. چاشقيندير، آجيغيندان يئره توٍپورور. دستهيی قالديرير، بير سكّه سالير. دانيشير، تپيكلرينی يئره دؤيه-دؤيه دانيشير. نهايت توْختاييب، گولومسهيير. گؤزلهمكده اوْلان دؤزومسوز آداملار اللرينی اللرينه، هردن ده ديزلرينه دؤيوٍرلر. بير نئچهسی سيرادان چيخيب، قارانليقدا گؤزدن ايتيرلر. ايچهريدهكی كيشی كؤشكدن چيخير. گهييرير، سوْنرا ماشينينا اوْتوروب، تلهسیک اوزاقلاشير.
گوْمبول بير آرواد، قوْلتوغوندا چهلييی، كؤشكه گيرير. بير آز دوروب نفسينی درير. دستهيی قالديرير. سكّه ساليب، باشلايير دانيشماغا. نهسه سوْروشور، تعججوبلهنير. چوْخ اينجيک گؤرونور. ائشيتمير، باشا دوشمور. دانيشير، يئنه ده دانيشير. سيرايا دوزولموش آداملار بئزيكيبلر. اوْنلاردان آجيقلی بيريسی يومروقلا شوشهنی دؤيور. قوْجا آرواد محل قوْيمور. دانيشا-دانيشا اوغونوب، كئچير. قوْلتوق چوبوقلارينی بير يانا آتير. كيمسه ايچهری كئچمهسين دئيه، آياغينی قاپیيا سؤيكهيير. ائشيكدهكیلر جانا گلميشلر.
كؤشكه گيرهن سوْنراكی آدام اوْن ياشيندا بير اوشاقدير. دستهيی قالديرير. دانيشير، دانيشير. هامی تلهسير. [اوشاق كؤشكدن چيخير] سوْنرا تلهسگنلر بيرـ بير ايچهری گيرير، ديرچهلير، باييرداكی آداملارا اعتنا ائتمهدن دانيشير، دانيشيرلار. دئييرسن كؤشك گوج مركزیدير.
سوْنونجو آدام، قوْجا بير كيشیدير. قيوير-زيويرلا دوْلو توْربا الينده ايچهری گيرير. يوْرغون، چاشقين. شوٍشهدن چؤله باخير، كيمسه يوْخدور. يئره سريلير. اوزانير كی، ياتسين، يومروقلا قاپينی دؤيورلر. يئلدير قاپينی دؤيور.
قوجا كيشی كؤشكدن ائشييه چيخير. تاختا اوْتوراجاغين اوستونه اوزانير. يئل كؤشكه گيريب، دستهيی قالديرير. ياغيش يومروقلا شوشهني دؤيور.
تاریخ
2019.08.14 / 18:12
|
مولف
غلامحسین ساعدی
|