کولت. آذ وقار نعمتین "گؤزَل فاطما" آدلی شعیرینی تقدیم ائدیر:

اوتور گل
گل اوتور یانیما
بؤیله الی‌سویوق گئتمه
دورما گل
دورما گل گؤزَل فاطما!..

یانیم سئودا، یانیم عشق
یانیم، یانیم عشق دئیه
یانیم، یانیم، یانیم آااا
اوتور گل سول یانیما
بؤیله اؤزونو توتما
دورما گل،
دورما گل گؤزَل فاطما!

سول یانیم گونشین آرخا باغچاسی
سول یانیم یانغین یانی
سول یانیم آی ایشیغی
سول یانیم پاییز گیلین
یاز گیلین یان کوچه‌سی
سول یانیم
طاهیر-زؤهره کوچه‌سی
او خان چوبان بولواری
گئتمه‌سن ده گئت آرتیق
گلمه‌سن ده گل باری
سن اؤزونو ائن آما!
آما اؤزو اونوتما
گل اوتور سول یانیما!
دورما گل گؤزَل فاطما!

هانی بو سس‌سیزلییین
گؤزلرین اوخویانلار
هانی سؤیله فاطیمه
گونشین ایشیغیندان
یون جوراب توخویانلار
او اسکی آداملیق‌لار
اؤلومه بئی وئریب ده
سیرادا بکله‌ین‌لر
گونشی بایراق توتان
اولدوزو سینه‌سینه
سینه‌سینه دؤین‌لر؟!

ساغ یانیم آغری، آجی
ساغ یانیم منیم دئییل
ساغ یانیم دار آغاجی
فاطیمه، دایان، دور، ایست!
ساغ یانیم قددار فاشیست!..

ایندی منی سوروشسان
ساغ سولومو ایتیردیم
ایتیردیم سنی گؤرجک
دئ سولوم ساغ‌می‌دیر پَک؟!
دور گل خالاسی گؤیچک
گل اوره‌ییمه اوتور!
اوتور گل،
گل شعری چوخ اوزاتما
دورما گل،
دورما گل گؤزَل فاطما!..