آنا صحیفه ادبیات |
کولت. آذ بختیار واهابزادنین شعیرینی تقدیم ائدیر:
قورخو کؤلگهسینه سیغینمیش بو گون
صداقت، دیانت، محبت، الله.
یالان حاکم اولوب، بهتان گؤزتچی،
چورویور زینداندا حقیقت، الله.
اَیری اَیریلیگی یئریدیر داشا،
کئچیب ایریلیکده هامیدان باشا.
دوغرو حسرت قالیب ایستی بیر آشا،
گؤرهن هارا گئدیر بو میللت، الله.
هفتهلر دییشدی، گونلر دییشدی،
طرفلر دییشدی، یؤنلر دییشدی.
قیبلهلر دییشدی، دینلر دییشدی،
ایته اوت وئریلیر، آتا ات، الله.
عنوانی دییشیب رذالتین ده،
قایماق دا ساتیلیر شور قیمتینده.
ایندی صداقتین سلطنتینده،
ایلشیب حؤکم ائدیر خیانت، الله.
ها چیغیر، ها باغیر، یالان آییلماز،
یاخشینی یاماندان آییران اولماز.
ساتسان، اوزونه ده باخان تاپیلماز،
نئجه اوجوزلاشیب لیاقت، الله.
یالانلار حقیقت قیافهسینده،
یکلر جؤولان ائدیر شش خانهسینده.
اوغرولار، اَیریلر زمانهسینده،
اَیریلیک ساییلیر، فراست، الله.
تاریخ
2020.06.19 / 15:16
|
مولف
آینورا مممدووا
|