آنام ایله فرش توخویاردیق، بیر ال ده میلچی-دن حیلمه ووروب، بیر ال ده ایسه ده-فه سالاردیق، آنامین اللری قابار باغلامیشدی، او قابارمیش اللری ایسته-سین من گؤرمه-ییم بویون باغی ائلردی بوینوما، (اوغول سنه ننه-ن قوربان) سؤزو سیرغا تک آسیلاردی قولاغیمدان، بویومو اوخشایاردی شیرین بایاتی ایله، اوغول دوغولاردی سسینده آنامین، گئجه مین گودوکجوسو ایدی، آی کیمی، گوندوزومون، گونش کیمین گولوشویدو، او منیم آنام ایدی، آنام ایله فرش توخویاردیق.

یوخودان دوراردیق بانلاماق سسی ایله، بیزیم ساهات بئچه سسی چیخارداردی، یوخسادا بئچه ساهات شکلینه گیرمیشدی!

آنام؛ اوغلوم گئجه نین گوندوزو دوغدو_سحر اولدو،

گون آیدین بالام! دئییب بوللو سوفرا آچاردی، چؤرک یئدیک-دن سونرا آنام ایله فرش توخویاردیق.

گون اورتا اولموشدو، اوخولا گئدیردیم گرک، پیچین اوسته قوورولان قوْرراما یئرآلما، ان دادلی گون اورتالیق ایدی، یئییب ایچدیک دن سونرا، میخی باشماغیمی گئییب یولا دوشدوم، قارا چای آرخیندان کئچه-جک یول دوغرو اوخولا گئدردی،

(از جلو نظام) سسی اوخولا یاخینلاشدیقجا قولاغیمدا جینگیلده ییب اتیمی تؤکوردو، قاپینین آغزیندا ساخلامیشدیلار یوبانانلاری، هله منده یوبانمیشام!

گوده چیبیق اللریمیزی آلدی آغزینا جیزیب داغیتدی، اوباشدان باخیب گولن چوخ ایدی.

اونلار یوبانمایانلاریدی، سسیمیزی اوتغونا _اوتغونا گئدیب گیردیک کیلاسا، ائله بیل اللریمیزین ایچینده گئجه چکیلمیشدی، آی سیز!---اولدوز سوز، قاپی نین تاق-تاق سسی ایله اؤیرتمن کئچدی کیلاسا، سالام وئریلدی آیاغا دوردوقدا، کیمسه نین اولوب-اولمادیغینی بیلمک اوچون آدینی چاغیردی، کارلار سسیمی ائشیتمزدی_کورلار اللریمی گؤرمزدی، وحید کیم دیرمی؟ سسی اوجالیر، سس-سسه ده-یدی منم سسینده، قورخونون باشینی باستیرمیشدیم، گؤزلرینی برلدیب سوروشدو:

نه-دن اللرینی قووزامیرسان؟

اللریم چیبیغین آغزیندا قالیب! سؤیله دیم، گولومسه ییب! گولومسه یه_ گولومسه یه! دئدی؛ نه دن چیبیغین آغزینا وئردیردین؟ آنام ایله فرش توخویاریق،

قاپالی-قاپالی گولوشونده دئدی؛ (چانتانی گؤتور گئت فرشینی توخو! )، اوخولدان ائویمیزه دوغرو، داها بو یوللار قریبه اولاجاق دئییرم،

چانتامی قارا چایا تاپشیردیم، هله ده آنام ایله فرش توخویاریق...