کولت. آذ نبی خزرینین "اولسایدیم" آدلی شعیرینی تقدیم ائدیر:

من بولاق اولسايديم سوسارديم‌مى هئچ؟

قاينارديم قايالار، داغلار ايچيندن.

دئيرديم، سن مندن بير آووج گل ايچ

كئچنده باغچالار، باغلار ايچيندن!

من آغاج اولسايديم، چينار اولارديم،

هر باهار سسله‌نيب گلرديم ديله.

سيزين باغچانيزدان من اوجالارديم

سنى اوياتماغا نغمه‌لريم‌له.

من كولک اولسايديم، چوخ تلسرديم،

بير آندا داغلاردان اؤترديم آسان.

گئجه قاپينيزدان آستا أسرديم،

دئيرديم يوخودان اويانماياسان

من بولود اولسايديم، قالخيب قايادان

قارلى زيروه‌لرده قوناق قالارديم.

يایدا گؤى اوزوندن اود ياغان زامان

سن كئچَن يوللارا كؤلگه سالارديم.

من دنيز اولسايديم، نغمه ديليمده

جوشارديم ابدى محبّت كيمى؛

ساخلارديم هميشه اؤز ساحیليمده

سنين ايزلرينى غنيمت كيمى.

من گونش اولسايديم، نور يايا-يايا

ظلمت گئجه‌لرى ائركن بوغارديم.

بوتون انسانليغی، بوتون دونيانی

سيزين ائوينيزين اوستده دوغارديم.