Axar.az
یوخاری
23 فئورال 2020


دؤرد بیر یانیم ناهنجار هنجار‌لار… - شعر

آنا صحیفه ادبیات
12 Punto 14 Punto 16 Punto 18 Punto

کولت. آذ گونئی‌لی شاعره معصوم جبارپوراین "دؤرد بیر یانیم…" آدلی شعیرینی تقدیم ائدیر:

دؤرد بیر یانیم معصوم
دؤرد بیر یانیم گوناه
دؤرد بیر یانیم ناهنجار هنجار‌لار
دؤرد بیر یانیم یاساق
یاساقلی معصوم‌لار
معصوم یاساق‌لار
دؤرد بیر یانیم گونش
دؤرد بیر یانیم کولک
باشیمین اوسته اولدوز‌لار
آی ‌لار … آی، ‌لار … آی وار
آییمی‌آیاق‌لاریندا داشیان قارتال
باشیمین اوستونده آللاهین قلبیری، اَله‌یی
اَله‌ییر باشیما الینه گلنی
اَله‌ییر باشیما سنسیزلیگی
اَله‌ییر باشیما ازدهام توسدوسون
اَله‌نیر باشیما، سئوگیلیمین اویناشی ایلا –
چکدیگی سیگارتلرین کولو
اَله‌نیر باشیما نه‌لر، اَله‌نیر
قارشیمدا سئل
قارشیمدا طوفان
قارشیمدا سن
قارشیمدا یاشاییش
قارشیمدا اؤلوم
قارشیمدا اوچوروم
قارشیمدا یاماج
قارشیمدا هر شئی
قارشیمدا هئچ نه
قارشیمدا اومــــــود!
قارشیمدا توهم !
قارشیمدا بوروخ- بوروخ یول‌لار
قارشیمدا ساکیت یاشاییش.
قارشیمدا «لقد خلقناالانسان فی کبد»
آرخامدا پلیس.
آرخامدا کلفچه‌لر،
آرخامدا پیس گونلریم، خوش گونلریم.
آرخام، آرخامدا …
آرخامدا دوشمان‌لار، دوست‌لار.

آرخامدا گوناه‌لار، توبه‌لر
آرخامدا تبسم‌لر، گؤزیاش‌لاریم
آرخامدا بنزین وار، یانغین وار
کول وار
کؤز وار
کؤزه‌رن کؤز وار
آمان الله یئل‌لر اسیر آخارمداکی یول‌لاردا
بازار‌لار وار، کوچه‌لر وار،
داشا دؤنموش جانلی‌لار، جانلانمیش داش‌لار
دییشیک روح‌لار، روح دییشیک‌لری
ساغیمدا سول وار
سولومدا ساغ.
ساغ سولوم ایلان،
بیر-بیرینی سانجیر هر یانیم
بیر یانیمدا تونجه‌لر، بیر یانیمدا ایت قاتیغی
بیر یانیمدا عشق میردار اولوب،
بیر یانیمدا نیفرت قوخویور
بیز یانیمدا خوروز‌لار دان اولدوزونا باخیب آغلاییر‌لار
بیر یانیمدا ایت‌لر کئفله‌نیب
«منده ایکی جهان یوخ، بو جهانین میندن بیری ده سیغیشمادی»*
منده هر شئی ایتدی، باتدی، بوغولدو
منده یارانان‌لار اؤلدو، تؤره‌نن‌لر، یاشایان‌لار
امما من، منده قالدیم. ایجیمده داشدیم، تؤکولدوم،
جالاندیم … دوندوم!
آخمادیم!
دؤرد بیر یانیم فیلیم
دؤرد بیریانیم نم نمنه !
دؤرد بیر یانیم «احمدکایا»
«دورد بیر یانیم پاس ایچینده
اؤنوم آرخام پوس ایچینده »

تاریخ
2019.08.29 / 13:27
مولف
آیتاج آراز
شرح لر
دیگر خبرلر

دیلیمیز دوستاق اولاندان آنام آغلار قالدی... - شعر

بو دونیانین یاریسی یوخ! - شعر

باخیردین، سئودییم، سن ملول-ملول- شئیر

شاه ایسماییلین ختا ائتمه‌سیله باغلی روایت

بو شعر تورک دیلی اوغرون‌دا مباریزه آپاران مرضییه حصر ائتدیلیب

آیری‌لیق مصیبت، آیریلیق ظولوم! - وهابزاده

دیلیمیز دوستاق اولاندان آنام آغلار قالدی- شعیر

صفویلر دؤولتی ایله باغلی تاریخی حکایه

بیتیرسن قاپی‌دا بنؤوشه کیمی…- شئیر

او فاحیشه‌نی سئویردیم - حکایه

خبر خطّی
 
Axar.az'da reklam Bağla
Reklam
Bize yazin Bağla