کولت. آذ کیان خیاوین "اؤزگور قادین" آدلی شئیرینی تقدیم ائدیر:

بارماقلاری بویولییجی اولسا دا،

بارماقلارییلا گل دئیه دانیشا بیله‌ن‌دن قورخما، گئت.

دوداقلاری بویولییجی اولسا دا،

دوداقلاری گل دئیه یازا بیله‌ن‌دن قورخما، گئت.

سورما اوزونه داغیلمیش آغ کیرلی سولار کیم‌دن

یاردیم ائت دورسون یئرین‌دن آنلام ترزی‌سی آراسین،

قویسون ترزینین ایکی گؤزونه

ان جیلیز خسته بؤجکلر آغیر گل‌سه بئله،

اینسان دیرین‌دن سئو، دینمه.

اللرینه پیس قوخولو بیر ییغین ات یوکله‌سه ده، سئو، دانیشما.

شهر-شهر بازارا چیخارت‌سالار دا، سئو

ان جیلیز خسته بؤجکلر بو اوجوز بیر فاهیشه‌دیر

دئیه جار چک‌سه‌لر ده سئو.

قوی بؤجکلر سنه باخیب آغیزدولوسو گولسونلر.

سن آغلا، سن دوشونه‌رک آغلا سئودیین قادینی اوریین‌ده

ترزیده عدالت یوخسول‌لوغونا آغلا و سورما

قادینین اوزونه داغیلمیش آغ کیرلی سولار ندن

ان جیلیز خسته بؤجکلر اینسان آرخاسینجا گوله‌جکلر

ندن، ندن، ندن، ندن،

بوراخ اونلار کیرلی سولارینی سونسونلار قادینا.

سونسون اونلارا آغزینی، دیلینی، اللرینی

وئرسین بوتون اورقانلارینی قادین دا سن سئو، دینمه.

قادینلار بیرر بویولییجی بارماقلارییلا

دانیشا بیلیرلر سئو، دانیشما.

بیرر بویولییجی دوداقلارییلا یازا بیلیرلر سئو، یازما،

قوی پیچیل‌داسینلار سنه بؤجکلر بیزی

دونیایا تانیملاییرلار دئیه

دونیا قادینا قییماییب

و اؤزگور بیر قادین‌دیر سئودیین قادین، بونو دوشون،

گل دئدی، گئت سنین اولسون گئجه‌یه یاخین زامانلار.

گئت دئدی، گئت اؤزگورلویو دوشونه‌رک.

گل دئدی، گئت سنین اولسون عؤموردن قالان بوتون سون ساعتلار،

گئت دئدی، گئت اؤزگورلویو دوشونه‌رک.

بوتون فیلملر بیتمیش: سون

گل سون پلان‌دا اؤپ منی و قال دئسه، گئت اؤپ و قال،

گئت دئسه، گئت اؤزگورلویو دوشونه‌رک.

عؤموردن اؤتکی ساعتلاردا دا

آغ کیرلی سولاردان اوزو تانینمیر کیمیلرینین!...