آنا صحیفه ادبیات |
کولت. آذ مدینه گولگونون "دورنالار قاییتدی" آدلی شعیرینی تقدیم ائدیر:
دئییردین باهاردا گؤروشریک بیز،
باهار گلدی،گئتدی، سن گلمز اولدون.
داشلارامی دیدی سیندی عهدیمیز،
آیلار گلدی،گئتدی سن گلمز اولدون.
دئدین،دورنالارلا گلرهم من ده،
دورنالار قاییتدی سن گلمز اولدون.
سارالدی یارپاقلار چؤلده،چمهنده،
پاییز فصلی چاتدی سن گلمز اولدون.
دئییردین قاپینا قونارام قوش تک،
قوشلار جه-جه ووردو، سن گلمز اولدون،
یاشاماق عشقیله وجده گلهرک
قوشلار یووا قوردو، سن گلمز اولدون.
دئدین نغمهلرله دؤنرهم گئری،
مین نغمه اوجالدی، سن گلمز اولدون.
توکندی عمرومون بهار گونلری،
کؤنلوم سنسیز قالدی، سن گلمز اولدون.
سنسیز دؤنه-دؤنه یوللارا باخدیم؛
گؤزلریم قارالدی،سن گلمز اولدون.
آی منیم تالعیم،آی منیم باختیم،
سؤیله،بو نه حالدی سن گلمز اولدون.
دردیمی آهسته چالدیم،سئوگیلیم،
سوسدولار چایلار دا سن گلمز اولدون.
آخی نئجه دئییم، هئچ گلمیر دیلیم،
ده بس قالدین هاردا سن گلمز اولدون؟
سن دؤنوک دئییلدین، دؤنوک دئییلسهن،
یقین...ائه نه دئییم، سن گلمز اولدون.
دؤزوملو اولسام دا،داریخیر هردن،
اووونمور اورییم-سن گلمز اولدون.
فقط اینانیرام، بیر گون اولاجاق
من دئمهیهجهم سن گلمز اولدون،
غمیم او حسرتلی گونده قالاجاق.
کیم دئییر سن خیال، یا بیر سس اولدون.
گون گلر دئمرهم سن گلمز اولدون...
تاریخ
2019.09.19 / 18:50
|
مولف
آینورا مممدووا
|