کولت. آز سلام ساروانین شئیرینی تقدیم ائدیر:

گئجه‌نین عینی واختین‌دا
اویاق قالانلارین گؤزلرین‌ده
جوربجور یوخوسوزلوق وار ایندی.

من بو ساکیت گئجه‌ده اوتوروب
اوزاق‌داکیلاریم باره‌ده دوشونوره‌م.
ایندیجه آنلادیم کی، گون ایشیغی یاخینی،
گئجه قاران‌لیغی اوزاغی گؤرمک اوچون‌دو.

یانیمیزداکی سئوگی‌لیلر
دوغما گلمز آداما.
دوغمالیق - کئچمیشین‌ده‌کیلرله
بیرگه خاطره‌لرین اولماغین‌دادی.

اوزوموزو اوزونه سؤیکدییمیز
سئوگیلیمیزین چیینلری اوستون‌دن
آیریلدیغیمیز آداملارا باخیریق اصلین‌ده.

ایندی بیلدین‌می، قیزیم،
نیه داریخیریق اصلین‌ده؟!

بیر آز دا گؤزلسی‌دیلر،
تراموایلار کیمی قاییداجاقدیق
گؤیه باخان‌دا ائلئکتریک ختتیمیزی،
یئره باخان‌دا رئلسیمیزی گؤره‌نلرین یانینا.

تکجه آند یئریمیز دییشمیر، قیزیم:
جانینا آند ایچدیکلریمیزین
قبرینه آند ایچیریک ایندی...

آند ایچیره‌م کی،
من سنین ان یاخشی کئچمیشین اولاجام...