آنا صحیفه ادبیات |
کولت. آذ ممد آرازین "من بئله دونیانین نییندن کوسوم؟!" آدلی شعیرینی تقدیم ائدیر:
سؤز وئردیم، سؤز آدلی دفینه وئره،
تک بیرجه اؤلومسوز قرینه وئره.
اومدوم نه وئردی کی، کوسدوم نه وئره؟
من بئله دونیانین نییندن کوسوم؟
ایتیریب اؤزونده اؤزونو دونیا،
تویلارین، یاسلارین اؤزولو دونیا...
الیم اتییندن اوزولو دونیا...
من بئله دونیانین نییندن کوسوم؟
عمرونه وای سالار، وایدان اوتانماز،
ساچ یولوب-های سالار،
هایدان اوتانماز،
گونشدن اوتانماز، آیدان اوتانماز،
من بئله دونیانین نییندن کوسوم؟
چایدی دهنهسینده خیرسیز اژداها،
گئجهسی سالامات چیخماز صاباحا.
ایتی بازاریندا آتیندان باها،
من بئله دونیانین نییندن کوسوم؟
داغ اولسان، ایستهسه قولوندا ساخلار،
بوکوب بیر هؤرومچک توروندا ساخلار،
یوز ایللیک اودونو قوروندا ساخلار،
من بئله دونیانین نییندن کوسوم؟
بیر گؤزو ایشیقدی،
بیر گؤزو بوزدو،
مکرلی قادیندی، گولچؤهره قیزدی،
حلیمدی، کؤورکدی، سرتدی، قودوزدو...
من بئله دونیانین نییندن کوسوم؟
آیاغی آلتینا یاستیق قویانلار،
باشینین آلتینا قومبارا قویدو!
نادانلار دونیانی قومارا قویدو!
من بئله دونیانین نییندن کوسوم؟
اولسان اؤز حاقینین کؤلهسی بئله،
اری اؤز ایچینده، اؤلزی بئله،
اوندان اینجییهنین بئلهسی بئله...
من بئله دونیانین نییندن کوسوم؟
تاریخ
2019.10.05 / 23:12
|
مولف
Axar.az
|