آنا صحیفه ادبیات |
کولت. آذ آقشین یئنیسئیین شعیرلرینی تقدیم ائدیر.
دیریلر اؤلولره قوللوق ائتمکدن تنگه گلیب
سئوگیلر آیریلیقلارین کؤلهسینه چئویریلیب
گؤزو یول چکهن هر شئیین آدی سئوگیدی
باش شامان بئله سؤیلهدی
و سوکوت بورودو بوتون معبدی.
ایندیکی زامان اؤز یاخاسینی کئچمیش زامانین الیندن آلماق ایستییر.
دیریلر اؤلولره قوللوق ائتمکدن تنگه گلیب.
سئوگیلر آیریلیقلارین کؤلهسینه چئویریلیب.
بوتون اومیدلر اؤلوب، اوزینه نؤوبتی کؤرپه اورکلر جوجریب.
من سنه یاخشیلیقدان باشقا هئچ بیر پیسلیک ائتممیشدیم.
گؤزلرینی اللریمله یومموشدوم، اؤزومو سنده اونوتموشدوم
قولاغینا اوزونؤمورلو سؤزلر پیچیلدامیشدیم...
سنه خیانت ائدن دوستلارا خیانت ائتمک لازیمدی دئمیشدیم.
اینسان بعضا جزادان اؤترو داریخیر
و جینایت تؤرهدیر
شوبههلی گؤرکمیله
اؤزونو جانی کیمی گؤستریر
او، جزا چکمکدن زؤوق آلیر.
اصلینده، سونونجو اومید یوخ، سئوگی اؤلور.
داغدا بیتمیش تک آغاجدان هر ایل پاییز کولیینده
نه قدر یارپاق تؤکولور.
سن سویوقسان، سن سازاقسان،
سن اؤزونو مندن قوپاران سون یارپاقسان.
سن ده ایندی هامی کیمی چوخ اوزاقسان، چوخ اوزاقسان.
بلکه ده، هئچ داها یوخسان، داها یوخسان.
من ایندی قوجایام، «هئچ واخت و هئچ کیم» حسینه قاپیلمیشام.
بیر واخت سنین گؤزلرینی یومدوغوم اللریمله
ایندی اؤز گؤزلریمی یومموشام.
هئچ اؤزوم ده بیلمیرم کیمی اونوتموشام.
ایندی اونا بدنیمین سول کونجونده یاس توتموشام.
هئچ بیلمیرم، کیمهم، نیهم، ندیر آدیم؟
بیرجه اونو بیلیرم کی، بو حیاتدا
آیریلیقلارلا یاشادیم،
من سئومیی باجارمادیم.
تاریخ
2019.10.06 / 20:38
|
مولف
آیتاج آراز
|