کولت. آذ آشیق آزافلی موکاییلدان بیر احوالات تقدیم ائدیر:

آزافلی_مکایيل تورمه ده اولان زامان،بير بولبول سسي ائشيدير،فيكيرله‌شیر کی او آزادلیقدا من قفسده،او آندا بئله يازير:

بولبول

بیر خبر وئر من دوستاغا
آچیلیب‌می یاز آی بولبول
دردیم چوخدور یازانمیرام
قلم گؤتور ياز آي بولبول

ائل كؤچورمو داغ سئيرينه؟
گلیرمی آران یئرينه؟
بنؤوشه‌لر بیر بیرینه
ائيله‌ييرمي ناز،آي بولبول؟

آزافلی تک یانما اودا
نعشه چوخدور بو حیاتدا
وئران قالميش قازاماتدا
یاندیم اولدوم کؤز،آي بولبول.

زامان گلیر حاق عدالت یئريني تاپیر،آزافلی یا خبر گتيريرلر آرتیق آزاد اولورسان .گلیر گؤزگویه(آینا) باخیر ایسته‌ییر اوزونه ال دولاندیرسین،باخیر کی ساچلار آغاریب.گوزگویه باخماغا پشمان اولور.اوردا بئله يازير:

بنزر

گوزگو سنه باخمایایدیم
قارا ساچیم آغا بنزر
ساققالیما قیروو دوشوب
باشیم قارلی داغا بنزر

داها جاندان جان سؤکولور
کیپریک گئدير قاش تؤكولور
فلك ايير بئل بوكولور
تاغي قوپموش باغا بنزر

آزافلی دیر منیم آدیم
زه هر اولدو شیرین دادیم
ال آیاغیم شاه قانادیم
شاختا وورموش تاغا بنزر.