کولت. آزگونئی‌لی شاعر اومید نجارینین بیر شعیرینی تقدیم ائدیر:

گؤزوموز آیدین، اوستاد!

اونیورسیتئت‌ده‌کی پیلله‌لرله سئوگی‌لی اولدوق.

قیرخ بئش میلیون آیاغیم‌دیر بو پیلله‌لرده،

دوشوندوکجه قیرخ بئش یاش قوجالیرام...

بیلکلریم‌ده‌کی بیلرزیکلرین جوابینی سوروشماغا گلدیم.

...کورییم‌ده‌کی یارالار یئنه آغریدیر، اوستاد.

قامچیلاری کس کی، کئچمه‌سین اینسان‌لیق فننینی،

کئچمه‌سین یوخولاریم‌دان ایشگه‌نجه قطاری...

نئچنجی کورسدا کئچجییک آغری فننینی،

گؤرجییک تبریزین ارکینی...؟!

...داها کسیلمه‌یه جانیم دا یوخدور

دیلیم کسیک- کسیکدیر، اوستاد!

دئ، گئتسین یوخولاریم‌دان

یئنه او کیشی منی گؤزو باغلی سوراقلاییر.

اونون چینینه تاخیلان اولدوزلار گئجه‌لریمی قارال‌دیر...

یوخولاریم‌دا قارانلیق اوتاق،

قارانلیق اوتاق‌داسا یئنه اؤزومو گؤروره‌م،

یئنه پنجره‌لر دارالیر دیوارلارین قوجاغین‌دا...