آنا صحیفه ادبیات |
کولت. آذ گنج شاعر اسد قاراقاپلانین «سونونجو سئوگی» شعیرینی تقدیم ائدیر:
بیر قادین دا سئومدیک، آیریلاق، شعیر یازاق.
بیر قیزلا ائولنمدیک، چکیلک، خوشبخت اولاق.
بیر ائویمیز اولمادی کیرایهلردن اوزاق
بیر اوغول بؤیوتمدیک، عسگره یولا سالاق...
هر شئی بیزدن بؤیوکدو، هر شئی بیزدن بالاجا
اورتالیقدا قالماغین جزاسی تنهالیقدی.
بونو دا بو شعیرین کونجونه یاز، بالاجا،
- بیز اولان سئوگیلرین باشیندا آیریلیقدی...
گئتدیک، گؤردوک آتامیز چوخدان اؤلوب... آنامیز
ائویمیزله برابر قوجالیب، الدن دوشوب.
باجیلار گلین کؤچوب، ائولنیب قارداشیمیز
حیط ده آغاجلاردان، آغاج دا گولدن دوشوب...
هر شئی سارالیب-سولوب بیز گئدندن شهره
بیز کیرایه قالاندان یئتیم قالیب اوشاقلیق...
بلکه سئومدییمیز بیر قادیندان اؤتری
یا چوخ بؤیوک آدامیق، یا دا کی چوخ اوشاغیق...
بیزی ده بؤیوتمهیه گوجو چاتماز شهرین
نه شهرلر وار بیزیم اوشاق خیالیمیزدا...
بو بؤیوک گئجهلرین آچیلمایان سحری
بیزی کیم آنلایاجاق، بیزی - بو حالیمیزدا...
بیر اوغول بؤیوتمدیک، عسگره یولا سالاق...
بیر ائویمیز اولمادی کیرایهلردن اوزاق...
بیر قیزلا ائولنمدیک، چکیلک، خوشبخت اولاق...
بیر قادین دا سئومدیک، آیریلاق، شعیر یازاق...
تاریخ
2019.10.13 / 15:19
|
مولف
آیتاج آراز
|