بو گون مممد آرازین دوغوم گونودور.

کولت. آذ ادیبین "یول آیریجین‌دا صحبت" شعرینی تقدیم ائدیر:

من اؤزوم بیلیرم نچییه‌م، نیه‌م؛
تیکدییم بو داخما، هؤردویوم بودور،
اوداسی ترتزه، اودو کؤهنه‌یه‌م،
الیم‌دن بو گلیر، گؤردویوم بودور...
بئشی خوشلاسا دا، بیری خوشلاماز،
سینمده بوز یانار، جان‌لی قیشلاماز،
قلمیم اوت بیچمز: کولش خیشلاماز؛
منی باغیشلایان اولارمی؟ -
چتین!

اؤزوم‌دن دانمیشام اؤز گناهی‌می،
نه قدر خیریمیز، شریمیز قالیب؛
دردسیز یوخ، بؤلوشه‌م کؤنول آهی‌می،
بیرجه سویولمایان دریمیز قالیب،
سویون دریمیزی، سویون، یاشایاق،
بئش گونلوک عؤموردو، قویون، یاشایاق،
قورد اولا بیلمدیک، قویون یاشایاق،
منی باغیشلایان اولارمی؟ -
چتین!

تالعلر دایاق‌سیز دایاقلار اوسته؛
بیر قلبی گؤینتمیر مین تالع دردی؛
توستولو، توستوسوز اوجاقلار اوسته
آشلاری بوغلانان بیگانه‌لردی.
من کی، هر اؤلنله اؤله بیلمیرم،
من کی، بؤلونمزی بؤله بیلمیرم.
اوزو دؤنوکلردن دؤنه بیلمیرم.
منی باغیشلایان اولارمی؟ -
چتین!

دئمدیم کیمه "شاه"، کیمه "یئتیم‌سه‌ن"،
بو قارا میللتین، بو آغ میللتین،
دئدیم کی، یئمینی الله یئتیرسین
آغلی گؤده‌نینه جالاق میللتین!
پایینی ایت قاپار مایماق میللتین!
یاماق میللتلره، یاماق میللتین!
قادینی ار دوغماز قورخاق میللتین!
منی باغیشلایان اولارمی؟ -
چتین!

دونه‌نیم، بو گونوم آیاغیم آلت‌دا،
باخیرام: اوفوق‌ده صاباح گؤرونور،
اینسان‌دیر چیخاران اینسانی یاددان:
صاباحین علین‌ده سلاح گؤرونور،
صاباحین دیلین‌ده سلاح سس‌لنیر،
ایلاهی، نه بؤیوک گوناه سس‌لنیر:
شاعر دوداغین‌دا بیر آه سس‌لنیر:
منی باغیشلایان اولارمی؟ -
چتین!

۲۳ مای، ۱۹۹۱