کولت. آذ رامیز رؤوشنین "آغلایان قادین..."آدلی شعرینی تقدیم ائدیر:

سوغان سویا-سویا آغلایان قادین!

عمرون سوغان کیمی آجیدی، آجی!
ملکسن، قیریلیب قولون-قانادین،
دردی وئرن الله، وئرمیر علاجی...

گؤزوندن سوزولن یاشی کیم سیلر؟
"گؤز یاشی"، دئدیین ندی؟ آجی سو...
بیر شیرین اؤپوشله باشلار سئوگیلر،
سونوندا همیشه سوغان آجیسی...

او، اؤپوش یاندیرماز دوداقلارینی،
سویویوب اود دولو او، قوجاق ایندی.
سایار بیرجه-بیرجه بارماقلارینی،
هر گئجه یودوغون قاب-قاجاق ایندی.

گلر "ار" دئدیین، هر گئجه یاری،
بیر قاشیق خؤریین باخماز دادینا.
یوخودا دیلیندن قوپان آدلارین،
بیری ده بنزمز سنین آدینا...

سوغان سویا-سویا آغلایان قادین،
گؤزونون یاشینی سیله بیلمرم.
نئیلییم، من سنه اؤزگه‌یم،یادام،
نئیلییم، یانینا گله بیلمرم.

بیر سئوگی گزیرم دونیادا من ده،
او سئوگی هاردادی؟ بیلمیرم آنجاق...
کیم سوغان سویاجاق منیم ائویم‌ده،
سوغان سویا-سویا کیم آغلایاجاق؟!...