Kult.az سیامک خانینین "سئچیلمیش تکجه قادین" آدلی شعیرینی تقدیم ائدیر:

یوخو گؤروردوم

اوتورموشدوم قطار دوراغیندا

چانتام یانیمدا ، بیر کورسونون اوستونده

بیر قورتوم چای ایچیب اؤنومدن کئچن قطارا باخیردیم

سنی گؤردوم..!

قطارین ایچیندن منه اَل ائله‌ییردین..

اینانمادیم. دئدیم خییال‌دیر

قطار چوخ هیزلی ایدی.

کورسودن قالخدیم. بیر سیگار آلیشدیردیم

باخیشلارینی یادیما سالدیم. نه گؤزل باخیردین

بیر قطار آیریسی گلدی

گئنه ده سن!

اولورمو بئله بیر شئی

گؤزلریمه گووه‌نمه‌دیم. گؤزلویومو سیلیب تمیزله‌دیم

فیکیره دالدیم

اینسان نه قدر بیریسینه اوخشایا بیلرکی

گلیب دووارا دایاندیم

بیر باشقا قطار. بو گئدیر ، اوبیریسی گلیر

هامیسیندا بیر اورتاق یولجو وار. چکیجی گؤزلریله ، اوره‌ییمی اوزَن گولوشلریله

بیر شئی آنلادیم

گؤردوکلریم یوخو دییلدی. اَن گئرچک اولان گئرچک

باشقا یاشاملاری سیناییردیم

دوشوندوم کی سن

هر یاشامیمدا سئچیلمیش تکجه قادینسان.