کولت. آذ آرش احمدینین" بو قدر غرورلو" آدلی شعیرینی تقدیم ائدیر:

بو قَدَر غرورلو بیر اوز دالیندا
کیم بیلیر یارالی نئچه اینسان وار
اوزومده بیلیرسن سئوینج اولسادا
آرخامدا پیچاق تک قالیب اینتیحار

بو قَدَر غرورلو قوجا بیر کیشی
آغاریب ساچلاری، چورویوب دیشی
اومودا، خَیالا قالیب دیر ایشی
یاشاملا اؤلومله اویناییر قومار...

بو قَدَر غرورلو قارلی داغ کیمی
داشماغا یاخینام سون بارداق کیمی
اولموشام هر شئیه، من قایناق کیمی
قورخدوغوم نه وارسا بئینیمه جومار

سئوگیلیم اوشویَن قلبیمی بورو
بوراخماز توتدوغون کور اولان بیری
نه قَدَر قلبینده کیچیک بیر یئری
هر دَیقه اوره‌ییم بیلمه‌دن اومار...