آنا صحیفه ادبیات |
کولت. آذ آذربایجانلی شاعر ائلچین آسلانگیلین "گئتملیگیک" شعرینی تقدیم ائدیر:
ساچلارینی دئییرم، ساچلارینی،
ایستانبول بویدا آیریلیغا اوزانیب.
سنین گؤی اوزوندن یاغیشلار قوپار،
چتیرسیز آداملار، بیر ده آداملار-
اللرینی قوجاقلاییب قاچسین دئیه،
قوشلار ایستی اؤلکهلره اوچسون دئیه...
شکیل-شکیل بؤیویورهم،
آدام-آدام یاشلانیرام.
یاشاماغا اومیدلری اوچوردوب
لاپ یئنیدن باشلانیرام.
ساچلارینی دئییرم، ساچلارینی،
ایستانبول بویدا کولکلرله اوچوشماغا اوزانیب.
گؤر نئجه اؤلدولر، نئجه قالدیلار-
بیر مرمیلیک آداملار،
بیر دؤیوشلوک جاوانلار،
بیر یاتاقلیق فاهیشهلر،
بیر کوچهلیک آج ایتلر.
بیر ده، اویونجاق اللر، او بالاجا کؤرپهلر.
قوللارینی دئییرم، قوللارینی،
هامینی قوجاقلاماقچون یارانیب.
گئتملیگیک،
اینانانلارا آند اولسون گئتملیگیک.
کوچه ایتلرینی کیلسه زنگلریندن،
او کیمسهسیز اوشاقلاری اذان سسیندن،
او مرمیلری اؤلدورمیین یاخاسیندان قوپاریب،
گئتملیگیک، اینان منه، اینان بیزه-
الله اؤزو ده دئیهجک کی، باشا دوشورهم سیزی...
ساچلارینی دئییرم، ساچلارینی،
نفسیمی کسمک اوچون اوزانیب،
گئتملیگیک...
تاریخ
2019.12.02 / 10:55
|
مولف
آیتاج آراز
|