کولت. آذ ستار گلمحمدینین‌" آذربایجان‌دیر آدیم" آدلی شعیرینی تقدیم ائدیر:

ائشیت منی اورکدن، دینله منی دریندن
کیملیگیمه گؤز یوموب، ای قوجاغیمدان اؤتن
قیسمت دییه باغرینی هر سحر آغشام دیدن
داغیلمازدی بینؤورم، سؤکولمزدی بنیادیم
آزربایجاندیر آدیم...

نئچه مین ایل اولارکی یوممامیشام گؤز بیرآن
یول گلیرم اوغورلا اسیرلر آرخاسیندان
حیات عشقی داشييب داماریندا قیزیل قان
یئر تیتردیر هیددتیم، اود پوسکورور فریادیم
آزربایجاندیر آدیم....

ظلمتدن بویلانمیشام گونش کیمی هر یانا
درد الیندن قاچانلار، گلیب منه درمانا
اینسانلیغین یولوندا قیمامیشام بیر جانا
هر زادیم اولوب آدیم، آدیم اولوب هر زادیم
آزربایجاندیر آدیم...

بیر یانیم زنگان دییه بیر یانیم دربند اولوب
قوینوم جننته بنظر، دیلیم شکر قند اولوب
حکمت اولوب هر سؤزوم، هر صحبتیم پند اولوب
سئوینج یاییب دونیایا هر آرزیم هر مرادیم
آزربایجاندیر آدیم...

چوخ گؤرموشم دونیانین مله یین ده، دیلین ده
دیمه میشم خطرینه هئچ بیر کسین ائوینده
گئچمیشیمی آرا تاپ زامانلار آرشیوینده
تاریخدیر منیم سینم، تاریخدیر منیم یادیم
آزربایجاندیر آدیم...

گئچمیشیم سیرالانیر یادداشیمدا، یادیمدا
یئنیلمز بیر قووه وار حکمت دولو آدیمدا
منی یاخشی تانیییر دشمنیم ده، یادیم دا
طوفانلار قاباقیندا اییلمه دیم، سینمادیم
آزربایجاندیر آدیم...

واخت اولوب سنه لرده اصلان کیمی قیزمیشام
آج گؤز حکمدارلارین اؤلوم حوکمون یازمیشام
واخت اولوب اؤز الیمله اؤز ريشه می قازمیشام
عشقیمه قوربان گئدیب چوخ اوغلوم چوخ ائولادیم
آزربایجاندیر آدیم

حیات دائیم یاشییر، بونو بیلیر بیلنلر
حیات دائیم ده ییشیر، بونو بیلیر بیلنلر
گؤر اؤزو نه گونده دیر، منه باخیب گولنلر
ای منی قاریش-قاریش تیکه-تیکه بؤلنلر
گون گلجک عشقیمه چاتاجاخدیر ایمدادیم
آزربایجاندیر آدیم...

ضررسیز دیر كؤر دییه گؤزومو اویاسان دا
نسیمی تک جانیمی باش آیاق سویاسان دا
تاپتالانمیش اوزومو هر رنگه بویاسان دا
عشقینده، ده ییشیلمز شیرینيمه فرهادیم
آزربایجاندیر آدیم...

من آلینماز بیر قالا من یئنیلمز بیر داغام
بؤیوک بابک لریمله تاریخده اوزو آقام
اوغلوم ستتار دئمیشکن دائیمی خزانسیز باغام
صحبتیم حق سؤزوم حق، آغزیمدا حقدیر دادیم
آزربایجاندیر آدیم...