کولت. آذ موسی یعقوبون "نیه گلمیسه‌ن؟" آدلی شعیرینی تقدیم ائدیر:

سولدوروب باغینی، تؤکوب بارینی،
داها شوخ‌دان سالیب یارپاقلارینی،
سولدوروب او چیراق یاناقلارینی
قیش اولوب، اوستومه نیه گلمیسه‌ن؟

سن آدلی او خانیم-خاتینی منه،
وئرمدین اؤز شاه‌لیق تاختینی منه.
قییمادین گول-چیچک واختینی منه،
قیش اولوب اوستومه نیه گلمیسه‌ن؟..

منی حسرت قویان ایلک بهرینه
ایندی گلیب منی یادا سالیب‌می؟!
گؤزونون آلووو اؤزگه‌لرینه،
ساچینین قیرووو منه قالیبمی؟
قیش اولوب اوستومه نیه گلمیسه‌ن؟

گؤزل‌لیک - نئیلدین او بخشیشینی،
گلمیسه‌ن، بس کیمه بخش ائتدین اونو؟
نه بیلدین تالعین گؤندریشینی
قایتارا بیلمیرم، نه بیلدین بونو؟
نه بیلدین من بیر آز اوریی کؤورک،
قادین باخشین‌دا مطیعم، لالام.
نه بیلدین او حسرت منی ایه‌جک،
نه بیلدین سنینچین کئچیلمیش یولام.
قیش اولوب اوستومه نیه گلمیسه‌ن؟..

آغلایان حیرسی‌می سویوتماغامی،
اینجیک اوریی‌می اویوتماغامی؟..
تکبرلو خانیم، آ نازلی خانیم،
یوخ، یوخ، یالواریشی ساخلا سن الله.
بو یازیق باخیشی ساخلا سن الله.
دی یاخشی، بو دیلی، بو فن‌دی ساخلا،
دیلینین آلتین‌دا او قندی ساخلا.
گوجون وار - کئچه‌نی قایتار، سوراقلا،
قیش اولوب اوستومه نیه گل‌می‌سه‌ن؟..

نه دئدین؟.. آه، بو نه یانیق‌لی سؤزدو!
بیر دایان، گؤزونده بو نه توران‌دی…
آه، منیم اورییم نه ایکی اوزلو،
ووقاریمی نئجه یئره ووراندی! -
باجارا بیلمدیم، اؤزومله، حیف!
قیش اولوب اوستومه نیه گلمیسه‌ن…