کولت. آز آیناز بزرگانین " أل‌لری… " آدلی حکایه‌سینی تقدیم ائدیر:

سحر تله‌سیک یوخودان قالخدې أل اوزالتدې ساعاتې گؤتۆرۆب باخا، یادېنا دۆشدۆ ساعات آشاغا قاتدا قالېب دوروب یوخولو-یوخولو پیلله‌لرین بیر نئچه‌سین إندی؛ أڲیلیب دوواردان آسلانمېش ساعاتا باخدې، ۶:۳۰ هله تئز ایدی قایېدېب گیردی یئرینه.

پتونو یاشام یۏلداشې، اؤزۆنه چولقالامېشدې یاواشجا پتونون قېراغېندان یاپېشېب اؤزۆنه سارې چکدی؛ قېچ‌لارېنې یارېیاجان سالدې پتونون آلتېنا؛ گؤزلرینی یوموب یوخوسو یادېنا دۆشدۆ، گۆلۆمسه‌دی، سئوینج بۆتۆن جانېنې بۆرۆدۆ.

بوگئجه یوخوسونون سئوینجیندن دفعه‌لرجه اۏیانمېشدې، یوخوسونو آن با آن دۆشۆنۆب بیر دادلې یئمک کیمی یاواش-یاواش دادېنې بۆتۆن جانېنا سیندیرمیشدی.

إولرینده’یدی، گۆن باتان زامان ایدی، پرده‌لر هر زامان‌کې کیمی چکیلمیشدی. گۆنشین قېزارمېش ایشېق‌لارې اۏتاغېن دووارلارېندان قاپېیا سارې چکیلمیشدی.

کیشی پنجره‌یه سارې اۏتورموشدو؛ اۆزۆ گؤرۆنمه‌ییردی گۆنشین بیر-ایکی شوعاسې أل‌لرینی ایشېقلاندېرېردې. أل‌لرین گؤرۆب تانېدې اۏنو.

اۆره‌ڲی دلیجه‌سینه چېرپېنماغا باشلادې. قېچ‌لارې‌نېن گۆجۆ یۏخو’یدو ایره‌لی گئده، اۏتوردو؛ کیشی باشېنې اۏنا سارې چئویردی گۆلۆمسه‌یه‌رک اۏنا باخېب دوروب گلدی یانېنا، ایندی اۆره‌ڲی إله چېرپېنېردې‌ کی، آز قالېردې آغزېندان إشیڲه چېخا.

گؤزلرینی تیکدی اۏنون أل‌لرینه. گۆنشین ایشېق‌لارې بارماق‌لارې‌نېن آراسېندان بیر ایپک قوماش کیمی کئچیب بیر سئحیرلی گؤرۆنتۆ وئریردی. اودقوندو؛ نفس چکمک چتین‌لشمیشدی. هر نفس چکدیڲینده هاوا بۏغازېنې یارا-یارا سینه‌سینه کئچیب یئنی‌دن سینه‌سینی یارا-یارا گلیب آغزېندان إشیڲه چېخېردې. تیترک بارماق‌لارېنې أل‌لری‌نین ایچینده سېخدې؛ دۏداق‌لارې بیر بیرینه دڲدی آما اؤزۆ ده اؤز سسینی إشیتمه‌دی بیر عؤمۆر حاضېرلادېغې سؤزلر سانکې بیر قوش اۏلوب هاوایا اوچدو…

کیشی هیجانلې گؤزلرینی اۏنون گؤزلرینه تیکیب اوزون سۆره هئچ دینمه‌دی، سۏنرا دۏداق‌لارې یاواشجا بیر-بیرینه دڲیب سؤزلری قادېنېن قولاق‌لارېنا دڲدی.

-بۆتۆن دئدیک‌لرین یالان اۏلدو!

سن إله سانېردېن گلمه‌رم آما گلدیم، بیر عؤمۆردۆ گلیرم؛ نه گئجه‌م وار نه گۆندۆزۆم ایل‌لردی یۏل گلیرم، بورا گلیب چاتماغېم تام قېرخ ایل چکدی. بیلیرم سن گؤزله‌ییردین تک بو اومود’لا ایل‌لر بۏیو یۏل گلدیم؛ تانېمایا-تانېمایا، سۏروشا-سۏروشا، آغلایا-آغلایا، آما آخېردا چاتدېم، یئتیشدیم.

کیشی أل‌لرین اوزالتدې اۏنا سارې، باخدې أل‌لرینی تانېیېردې تا اوزاقلاردان، دۏغولمامېشدان بئله…