کولت. آذ گونئی‌لی یازار ملیحه عزیزپورون "کؤرپه" آدلی حکایه‌سینی تقدیم ائدیر:

آنا اون اوچونجو دؤنه دوغ‌دو. یئنه ده کؤرپه‌سینین اینقه سسینی دویمادان آییردیلار اونلاری. آنا آغزینی یئردن-گؤیه قدر آچیب باغیردی. دوغوم سانجی‌سین‌دان دئییل، آیریلیق آغریسین‌دان دا یوخ. دؤشلری پارتلاییردی یازیق قادینین.

قودوز سیچانلار اونون امزیینه داراشدیلار. بیر داملا سودو یئره دوشمه‌مه‌لی ایدی یوخسا...

آنا آجیمادی. عینی بیرینجی‌دن اون اوچونجویه‌جه‌نین ترسینه. آنا گولدو. عینی بیرینجی‌دن اون اوچونجویه‌جه‌نین ترسینه.

* * *
کؤرپه‌نی بیر داخمایا آپاردیلار. اوراسی اؤلوم قانی ایدی دئیه‌سه‌ن! داخمانین هر بوجاغینا، اورادا اولان کؤپکلری ایللر بویونجا آجلیقدان قورویاجاق قدر سوموک قالانمیشدی.

قانجیقلار اولاشیردی. اونلارین دا امزیکلری پارتلایاجاق قدر شیشمیش‌دی. او ایسه کؤرپه‌نی گؤرجک گؤزلری گولدو. آخی، کؤرپه اونلاری او جانالیجی آغریدان قورتاراجاق تک کیشی ایدی. قانجیقلار، کؤرپه‌نی امیز دیرمک اوچون سیرا چکدیلر، آنجاق اونلارین هئچ بیریسینین امزیینی توتمادی اوشاق. اونلار اؤز-اؤزلرینی عمه‌یه باشلادیلار. اونلار امیش دیکجه کؤرپه قوسدو. اونلار هوروشدوکجه کؤرپه سوسدو.

* * *
قانجیقلار راحاتلانمیش کیمی گؤرونوردولر. آنجاق کؤرپه سانجی‌دان آغلاماغا باشلادی. اونون قارنی ائله شیشمیشدی کی، حامیله قادینا بنزییردی و او گؤرونتو اونا هئچ یاراشمیردی. قانجیقلار، یئنه ده امزیکلرینین آغریسین‌دان هوروشمه‌یه باشلادیلار. کؤرپه اونلاردان قورخموش کیمی گؤرونوردو. بیرازدان سونرا او دا باغیرماغا باشلادی. سانکی دوغوم سانجیسی چکیردی زاواللی اوشاق.

قانجیقلارین هوروشمه‌سی کسیلیردی آستا-آستا و بو حال کؤپکلری چوخ شاشیردیردی.

کؤرپه ده سوسموشدو آرتیق. آخی، او دا راحاتلاشمیش‌دی. کؤرپه، بیر سورو سیچان دوغموشدو.