کولت. آذ گونئی‌لی شاعر محمد کارگرین "نازلیم" آدلی شعیرینی تقدیم ائدیر:

بو ایل ده بایراما سنسیز یامان دئدیم نازلیم!

بو ایل ده بیزدن اوزاق گز، دولان دئدیم نازلیم!

نه فایدا کؤهنه سؤزو ایل به ایل دولاندیرماق

او سئوگیدن سؤز آچاندا دایان دئدیم نازلیم!

و بوش-یالان دانیشیقلار باشیمدا توی توتدو

اوزاتدی صؤحبتی، من ده اوزان دئدیم نازلیم!

دایانمیشام زوپویور هئی فلک یومورتا تکین

و سیندیریب قاناداندا بویان دئدیم نازلیم!

سینه‌مده بایرام اوتوندان آلوولو‌دور اؤز اوتوم

و گؤرجه‌یین هر اوتو من اوتان دئدیم نازلیم!

سنین قاییتماغینی تانریدان نزول دیله‌دیم

خرابه مسجیدین ایچره اذان دئدیم نازلیم!

سویوخدا قالمیش اوتاق‌لار -اونوت-اونوت، دئدیلر

دئدیم: باش اوسته! بیلیرسن یالان دئدیم نازلیم!

او قیشدا قارلا یاتان داغ دا پالتارین دییشیب

من آمما بایراما سنسیز یامان دئدیم نازلیم!