کولت. آذ گونئی‌لی یازار آقشین آغکمرلینین "دوندورماچی" آدلی حکایه‌سینی تقدیم ائدیر

هر گون سحر-سحر پنجره‌دن یالنیز بیر سسی ائشیدیردیم. او سس ایله یوکسلیردی دویغولاریم، قانادلانیردی دیلکلریم. هر گون سحر-سحر پنجره‌دن یالنیز بیر سسی ائشیدیردیم. او سسین سانکی ایچیم‌دن گلدیینی دویوردوم.

بو گون ده پنجره‌دن سحر-سحر یئنه او سسی دویدوم، هئچ دوشونمه‌دن ایچیم‌دن قرار وئردیم. قاپیلاری آردی-آردینا چالاراق یولون سونون‌دا اؤزومه گلدیم.

باغیردیم، آغساچ‌لی یورغون و کدرلی دون‌دورماچی تکرلی سویودوجوسونو ساخلادی. من ایسه اونا یاخینلاشیب بیر دون‌دورما ایستدیم، دون‌دورمانی منه ساری اوزات‌دی.

بیر آن ندن‌سه او اوزگون باخیشلارین‌دا داغ یانار اولدو، گؤزلرین‌ده دنیز دالغالانیب توفان اولدو. یئرین چکه بیلمدیی قدر آغیر اولدو، بیر آه قدر یوخ، بیر توز کیمی اوچان اولدو.

دون‌دورماچی دون‌دورما ساتدیغینی چوخ‌دان اونوتموش‌دو. شهه رین گورولتوسونو، اینسانلارین روح‌سوز فریادینی، بوتون کئچمیشینی، گه لجیینی چوخ‌دان اونوتموش‌دو.

بیر آن اؤزونه گل‌دی، بیر سؤز دئمک اوچون آدی‌می سوروش‌دو.

من اودقونا-اودقونا باخیشلاری‌می یئره دیکدیم.

بوتون ووجودوملا، بوتون وارلیغیملا، ایچیم‌دن قوپان بیر سسین هایقیرماق ایستمیینه باخمایاراق دوداقلاریم‌دا یالنیز بو سؤزلر جانلان‌دی: «گون ... ائل».

«گونئل» – دئییب دوردوم. گؤزلری‌می یئردن آییرمادان دوردوم.

«سنین نه گؤزل آدین وار»، – دئیه دیلالتی بیر نئچه دفعه تکرار ائتدی: «گونئل، گونئل».

قاشلارینا ایلمک وئریب، گؤزلرینی قیییب یاریم تبسسومله دئدی:

«قیزیم نیه اوتانیرسان کی؟ بلیرسه‌ن‌می، سن اولماسان حیاتین هئچ آنلامی دا اولماز. گؤرونور، بو گؤزل آدینی سنه آتان وئریب».
دون‌دورماچی سونون‌دا بیر تبسسوم ائتدی. پولونو آلمادان سرعتله اوزاقلاش‌دی.

او، آرخاسینا باخمادان اوزاقلاش‌دی، من ایسه یاواش-یاواش اؤزومو توپارلاییب فی کره دالدیم.

«بو آدی منه آتامین قویدوغونو او هارادان بیلیردی؟» – دؤنه-دؤنه دوشوندوم.

ایندییه قدر بو سؤزو کیم‌سه منه سؤیلممیش‌دی. آه، آتام، آتام!

اونون سؤزو اورییمین جانی اولدو، معناسیز حیاتین آدی اولدو. آیریلیغین دادی اولدو؛ یالنیز اونو دوشوندوم، دویدوم. دوشوندوم کی، من اونو هاراداسا گؤرموشه‌م. دور مادان ائوه طرف قاچدیم.

پیلله‌لرله یوخاری دیرماندیم.

اوتاق سانکی بیر قفس ایدی.

پنجره‌نی آچدیم، هاوانی اودوم-اودوم اوددوم؛ ساچلاری‌می اوخشایان یئل‌ده آتا مهببتی، آتا هسرتی دویدوم.

اسکی پالتار ایشکافینی آلت-اوست ائدرکه‌ن گلینجییمین قولو علیمه ساتاش‌دی. گلینجیک گؤزلرینی آچیب منه باخ‌دی: اونون آدی اولدوز ایدی. ائینه‌ن صمد امینین اولدوزو کیمی. آنامین آلبومونو هیه‌جان دولو سوکوت ایچین‌ده واراقلادیم.

ائله بیرینجی صحیفه‌ده او گئرچیی اؤیرندیم، دون‌دورماچی منیم آتام‌دی. آتام.

اما دون‌دورماچی چوخ‌دان گئتمیش‌دی.

اونو چوخ‌دان یوللاردا ایتیرمیشدیم.

نه یازیق کی، بیر داها سحرلر اونون سسینی دویمادیم. بیر داها اونو دینلمدیم.

ایندی من یالنیز اونو گؤرمک آرزوسو ایله یاشاییرام.