کولت. آذ تبریزلی یازار روقییه سفرینین "ساری دوش" آدلی حکایه‌سینی تقدیم ائدیر:

بو گلن سس سوچوبابانین سسی‌دیر.

- سو گتیرمیشه‌م، بالا. گلین آلین.

سانکی ایستی تن‌دیرین ایچین‌ده‌یه‌م. بده‌نیمین هر طرفین‌دن تر، سئل کیمی آخیر. آغزی‌می آچیب سو ایسته‌یه‌ن‌ده دیلیم داماغیما یاپیش‌دی، بیر سؤز دئیه بیلمدیم. سوچوبابانین سسی یئنه قولاغیما دییر. یقین محله‌یه سو گتیریب. سوچوبابا آدینی محله‌نین قادینلاری اونون اوستونه قویوبلار. ائله بیز ده اونو بو آدلا سسلیریک. بیر آزدان قادینلار باشینا قومالاشیب، اللرین‌ده‌کی وئدره‌لری دول‌دورماق اوچون بیر-بیرلرینی ایت‌له‌ییب چیغیر-باغیر سالاجاقلار. سوچوبابا ایسه هر زامانکی تمکینینی ایتیرمه‌دن ائششیینین اوستون‌دن یئره قویدوغو سو قابلارینی قالدیریب بیر داها ائششیین بئلینه آتاراق دئیه‌جک:

- بئله ائلسز، بیریزه ده سو وئرمه‌یه‌جه‌یه‌م.

قادینلار مجبوره‌ن سیرا ایله دایانیب، وئدره‌لرینی دول‌دوراراق، اللرین‌ده‌کی بیر قیران پولو سوچوبابانین اووجونا سالاجاقلار. سوچوبابا ایسه یئنی‌دن قابلارینی دولدوروب ساتماق اوچون، اوچ دایاناجاق‌لیق یولو گئتمه‌لی اولاجاق. یئنه ده ناصر آغزین‌داکی ۴۰ آیاق‌لی سرداب‌دان سو گؤتوروب، تک باشینا ۴۰ پیلله‌دن چیخاراجاق و ائششیینه چاتاراق سویو اولمایان محله‌لرده ساتاجاق‌دی. محله اهلی آنجاق ایچمه‌لی سویونو اوندان آلاردی. یومالیلاری ایسه محله‌نین آرخاسین‌دا، کلمممدین باغین‌دان کئچه‌ن آرخین سویون‌دا یویاردیلار.
دیرسکلری‌می یئره دایاق وئریب کوریی‌می یئردن قالدیردیم. گؤزلری‌می آچان کیمی ایشیق قاماشدیردی. یئنه یومدوم گؤزلری‌می. بوغازیم قوپ-قورو قوروموش‌دو. اودقوندوم. گوج ایله «سو» دئیه بیلدیم. بیر قادین اللری آنلی‌می اوخشادی. یوموشاقلیغین‌دان قادین علینه اوخشاتدیم. بیر علینی کورییمه قوی‌دو. آغزیما سرین نیین‌سه توخوندوغونو هیسس ائتدیم.

-ایچ -دئدی.

سویو بیر ایچیم‌ده ایچدیم. سونرا بیر داها یئره اوزاندیم. بو دؤنه‌م گؤزلری‌می آچا بیلدیم. باشیمین اوستون‌ده‌کی قادین آنام ایدی. گؤزلرینین قیراقلاری قیریشمیش‌دی، سانکی قویویا باتمیش‌دی.

سوروشدوم:

- سوچوبابا گلیب؟

علینی بیر داها آلنیما قوی‌دو. ندن‌سه باشینی بولادی و اوندان سونرا باخیشلاری داها دا قایغی‌لی گؤرون‌دو منه.

یاشار پئلی دسته ایله ووروب آتان کیمی آرخاسییجا قاچدیم. من هامی‌دان هیزلی قاچاردیم. نفسیم کسیلمه‌دن نئچه دقیقه اولایاراق قاچاردیم. بونا گؤره پئلدسته اوینایان‌دا، پئلین آرخاسینجا داها چوخ من قاچاردیم. مرزییه یولومون قیراغین‌دا اولسای‌دی، بیر ایش گؤروب منی ییخاجاغینی بیلردیم. قیچی آخسادیغینا گؤره اونو اویناتمازدیق. بو اوزده‌ن بیز قاچان کیمی یولوموزدا دایانیب یاخینلیغین‌دان کئچه‌ن‌ده آیاغیمیزین آلتینا بیر داش آتار، آیاغینی اوزادار و یا باشقا بیر اویون چیخاریب اویون‌چولاری ییخاردی. من ده ایشی‌می یاخشی بیلیردیم. اونو اوزاق‌دان گؤره‌ن کیمی یولومو دییشیب اوندان آرا آچاردیم. سوچوبابانی محله‌ده گؤره‌ن کیمی سوسوزلوغوم یادیما دوش‌دو. پئلی تئز یئرینه چات‌دیرماق اوچون داها هیزلی قاچدیم. مرزییه‌نین آیاغی آیاقلاریما دولاشان کیمی یئره چیرپیلدیم.

- سو گتیرین، اوریی پیس اولوب.

چئشیدلی سسلر قولاغیما دییردی. کاسا آغزیما دیه‌ن کیمی سوچوبابانین کاساسی اولدوغونو بیلدیم. گؤزلری‌می آچدیم. سوچوبابانین ساخ‌سی کاساسین‌دا منه سو گتیرمیش‌دیلر. آنام باشیمین اوستون‌ده اوتورموش‌دو. باشی‌می دیزی اوستونه آلمیش‌دی. اوشاقلار دا بیزیم باشیمیزین اوستونه قومالاشیب، اللرینی دیزلرینه دایاق وئره‌رک ایکی قات اییلمیش و اوزومه باخیردیلار. سویون هامی‌سینی ایچدیم. آنام کاسانی سولمازا ساری اوزات‌دی:

- آپار سوچوبابایا وئر کاسانی،- دئدی.

سولماز کاسانی توتان کیمی اوشاقلار اللرینی اوزادیب قیزین علین‌دن قاپ‌دیلار. کاسا یاشارین علینه دوش‌دو. آغزینا دایاییب باشینی یوخاری قالدیردی.

– گئده هام‌می‌سین ایچیب! - دئدی و کاسانی سولمازا قایتاردی.

محله‌نین اوشاقلاری او کاسادا سو ایچمیی چوخ خوشلایاردیلار. سوچوبابا کوچه‌ده ییخیلان اوشاغی گؤردوک‌ده اؤز کاساسینی دولدوروب اوشاغا وئرردی. پول وئرمه‌ییب سو ایچمک جانیمیزا یاتاردی. بونا گؤره ییخیلان‌دا او قدر ده اینجیمزدیک. آیاغیم پارچالان‌سا دا اوزومه گتیرمدیم. مرزییه قاپیلارینین بؤیرون‌دن باشینی اوزادیب منه باخیردی. اوزونه باخیب دیلی‌می چیخاردیم. سویون دادی هله داماغیم‌دان چکیلممیش‌دی. من اویناماسایدیم اوشاقلار اویونو کسردیلر. آنام قولوم‌دان یاپیشیب ائوه آپاردی.

هاوانین ایستی‌لیگی اوریی‌می داریخ‌دیریردی. علی‌می قالدیریب اوستومه چکیله‌نلری قیراغا آتدیم. او قدر ده سرینلمدیم. بؤیروم اوسته دؤندوک‌ده آیاغیم دؤنمه‌دی. یامان آجیش‌دی. یادیما دوش‌دو. کوچه‌ده ییخیلان‌دا پارچالانمیش‌دی. اوتاق‌دان سسلر گلیردی. گؤزلری‌می آچماغا اینجاریم یوخ ایدی. آنجاق ائشی‌ده بیلیردیم. بیری‌سی آنامین سسی ایدی. دئییردی:

- ایکی گئجه-گوندوزدور یئرین‌ده سایاخلاییر.

بیر ده کیشی سسی ائشیدیلیردی:

- آیاغین‌داکی قورشونون یئری چیرک ائدیب. یاراسی آغیردی. درمانلارین یئرین‌ده وئرین، اینشاللاه ساغالار.

کیمه قورشون دیمیش‌دی‌سه سوروشا بیلمدیم.

کلمممدین باغین‌داکی آرخین قیراغینا گئدن‌ده قیزلاری آپارمازدیق. باغین یوخاری‌سینا گئدیب، سویونوب سویا دوشردیک. باغین یوخاری‌سین‌دا کیم‌سه اولمازدی. یایین ایستی‌سین‌ده آرخین سرین سویو بده‌نیمیزه دیه‌ن کیمی دیکسینیب ایچیمیزی چکردیک. بیر آزدان سرین‌لییه آلیشاردیق و کلمممد باغبانین های-کویو و سؤیوشلرینی ائشیتمه‌یه‌نه قدر بیر-بیریمیزی سولایاردیق. کلمممد آرخامیزجا دوشه‌ن‌ده من‌دن باشقا هامی‌سینی نئچه دؤنه توتوب دؤیموش‌دو. من هامی‌دان هیزلی قاچدیغیما گؤره علی چاتا بیلممیش‌دی، اونا گؤره من‌دن یامان آجیق‌لی ایدی.

اوغلانلاری باشیما توپلاییب آرخین قیراغینا گئتدیک. بده‌نیمیزین تری کؤینکلریمیزی ایسلاتمیش‌دی. آرخین گئنیش اولان چیممه‌لی یئرینه بیرینجی من چاتیب، سویا دوشدوم. آیاقلاریم سویون لئهینه قویلان‌دی. لئهین ایچری‌سین‌ده نسه منی ایچری سوموروردو. گؤلمچه‌نین قیراغین‌داکی اوتلاری توتوب اوجادان چیغیردیم. اوشاقلار قاچ‌دیلار. دئدیم:

- اولان*، منی چیخاردین. هارا قاچیرسیز.

آرخالارینا باخا-باخا اوزاقلاش‌دیلار. اوزاق‌دان کلمممد بئلین علینه آلیب منه ساری قاچیردی. سویون دیبین‌ده‌کی لئهه قویلانیب چیخا بیلمیردیم. سانیردیم اللری‌می ده بوراخ‌سام لئهه جومارام. چیغیرتیما اؤزوم ده یئریم‌دن داشلانیب قالخدیم.

آنام منه ساری قاچیردی. پنجره‌دن ائشیک قاپ-قارا گؤرونوردو. آنام منه چاتیب اوستوم‌ده‌کی یورقانی قیراغا آتدی. آیاغیما باغلانمیش آغ ساریغا قان لکه‌لری دیمیش‌دی. باغلانمیش قیچی‌می دیزیم‌دن سیخدیم. آنام دیزلری اوسته اوتوروب اللرینی اوغوشدوروردو. اوزونه باخدیم. قیریشلار اوزونو بوروموش‌دو. یادیما دوش‌دو، دئییرمیش نئچه گئجه-گوندوزدور ساییقلاییر. قورشونون یاراسین‌دان‌دیر شوبهه‌سیز. بؤیروم‌ده‌کی گویومون سویونو بیر ایچیم‌ده باشیما چکدیم. سوچوبابانین سویونون دادین‌دا ایدی.