کولت. آذ ائلشن ایسماییلین "عجم قیزی" آدلی حکایه‌سینی تقدیم ائدیر:

تخمیناً ۵۰۰ ایل بون‌دان اؤنجه اولاردی... قودرتیله دونیانی لرزه‌یه گتیره‌ن ایکی نهنگ تورک ایمپئرییاسی – عثمانلی و صفوی خان‌دان‌لیغی، ایکیوزلو، منفور آوروپانین ایللردیر پلانلاشدیردیغی، اما حیاتا کئچیرمه‌یه جسارت ائتمدیی «بؤیوک اویون»-آ تأسفلر اولسون کی آلدانمیدی. او زامانکی آوروپا درین دؤولتینین اساس بئینی اولان واتیکان و وئنئ‌سییانین خصوصی اولاراق یئتیشدیردیی و هر ایکی تورک ایمپئراتورلوغونون ایچینه یئرلشدیردیی، اساساً «میللی آزلیق»-لاردان تشکیل ائدیلمیش جاسوسلار نئچه ایل دورمادان مهارتله چالیشمیش، نهایت ایکی قارداشی – سلطان سلیم و شاه ایسماییلی ساواشا سوروکلمیشدیلر. دونیانی تیتره‌دن، قورخویا سالان بو ایکی ایمپئرییا آرتیق بیر-بیریله ساواشا باشلامیشدی...

اجدادلاری قاملارین – شامانلارین بئش مین ایل اؤنجکی عنعنوی پرینسیپلرینی اونوتمامیش، اما یئنی‌لشمیش، ۱۶-جی عصر شرایطینه گؤره فورمالاشمیش، داها دا تکمیللشمیش دینی-فلسفی جرهیانین هامیلری اولان درویشلر، شئیخلر، صوفیلر اوجاغی اردبیل‌ده ایسه بو ساواشین تأثیری گوجلو اولسا دا، فانی عالمی ائله ده اؤنمسه‌مه‌یه‌ن، معنوی صافلیغین قازاندیردیغی ایلاهی اوجالیقلا برابر یوکسک اینسانی کئیفیتلره مالیک بیر قروپ درویش اوجا تانرییا عشقلرینی مینیللرین مقدس آلتلری ساز، قاوال، بالابان، تار، کامانچا واسیتسیله غیری-عادی شکیل‌ده ترنم ائدیردیلر:

اولو تانری آدین توتوب،

قوتلو شامان یولون توتوب،
هر جور مونکیری اونودوب
گلدیک یولا، به هی درویش،
دولا-دولا، به هی درویش...

بیز «اول» تانریدان گلیریز،

تانری حاقین سؤز بیلیریز،
قوتلو «سؤز»-دور تورک دیلیمیز،
گلدیک یولا، به هی درویش،
دولا-دولا، به هی درویش...

حاق اوچون «هو» سؤیلریک بیز،

قوتلو جهاد ائیلریک بیز،
حاق-دان رضا دیلریک بیز.
گلدیک یولا، به هی درویش،
دولا-دولا، به هی درویش...

هونکاریمیز خیزیر سلطان،

قوتلو روح-دور گئرچک اولان،
بیز علییه توتدوق عنوان،
گلدیک یولا، به هی درویش،
دولا-دولا، به هی درویش...

«دؤرد عنصور»-اون هامیسیییک،

شرقله غربین واریسیییک،
بیز تانرینین بنده‌سیییک،
گلدیک یولا، به هی درویش،
دولا-دولا، به هئی درویش...

بو و سایره ایفاده‌لرله، سؤزلرله، موختلیف شعیر پارچالارییلا اؤز «عبادت»-لرینی داوام ائتدیره‌ن درویشلر عینی زامان‌دا معلوم قارداش قیرغینین قارشی‌سینی آلا بیلمدیکلرینه گؤره ده آه-ناله ائدیردیلر:

غریب قارداش، من ائللردن اوزاغام،

کؤنلوم اوردا، جیسمیم ایله ایراغام،
واللاهی بیل، من یاغی‌دان قیراغام،
اوزریمه قیلینج ایله گلمه سن،
اول یارالی بو قلبیمی دلمه سن...

قریب قارداش، هئچ بیلمدیم نئج اولدو،

یاغی مندن، یاغی سندن بیج اولدو،
فانی اولدوم، فیکریم-ذکریم گوج اولدو،
اوزریمه قیلینج ایله گلمه سن،
اول یارالی بو قلبیمی دلمه سن...

غریب قارداش، قیلینج کسر، قان آخار،

بیر یاغی‌دان بیر یاغییا یول چیخار،
بیز ووراریق اؤزوموزو، او، باخار،
اوزریمه قیلینج ایله گلمه سن،
اول یارالی بو قلبی‌می دلمه سن...

غریب قارداش، چالدیران‌دا جان دئدیم،

دوشمن اولدوم من اؤزومه، «قان» دئدیم.
وور آتشی، وور کؤنلومه، «یان» دئدیم.
اوزریمه قیلینج ایله گلمه سن،
اول یارالی بو قلبیمی دلمه سن...

تانری اوچون، آخی بو ساواش نیه‌دی؟

ساغیم، سولوم، اؤنوم، آرخام تیه‌دی،
دون «قارداش» دئدییم بو گون نئیله‌دی،
اوزریمه قیلینج ایله گلمه سن،
اول یارالی بو قلبیمی دلمه سن...

داوامی وار