کولت. آذ گونئی‌لی شاعر اومید نججارینین "قلپه‌لر" آدلی شعیرینی تقدیم ائدیر:

اووجوم‌دان اس‌ن کولکلر

چیرپینیب ییخیلار بیر گون ترک ائتدیین یوللارا...

ترته‌میز بیر پاییز آخشامین‌دا پالچیقلارلا کیرلنر خاطره‌لر

ساعتین اقربلری تک

فیرلانار خارابا دییرمانلارین آغری داشی،

ایسلانار یاغیشلار اوستون‌ده گؤی اوزو،

ایسلانار یاغیشلار آلتین‌دا پنجره‌لرین گؤز یاشی.

سانییه‌سی نئچییه‌دیر گؤزلرینیزین سوروشا بیلره‌م‌می؟

...سکامیالار اللهین آتیلمیش اوغلو،

تنهالارین سورگونلوک‌ده سیغیناجاغی، سکامیالار.

سکامیالار،

اوستونه شئیر یازیلار آغلیمین کوچه‌لره‌ن‌دن کئچرکه‌ن یارپاقلار...

قاران‌لیغی یالایار بیر کیم‌سه‌سیز ایتین تنهالیغی.

...اوچار آغاجلار گؤی اوزونه،

قونار آغاجلار بیر قوشون بوداغینا،

آغرییار قورشونلارین ویجدانی.

منیمکی شئیر یازماق دئییل،

اوتوروب بیر-بیر روحوما باتان قلپه‌لری چیخارماق‌دیر منیمکی!

سنی دوشونمک دئییل،

...گئجه‌لر گونباخانلارین باخدیغی یئره باخماق‌دیر منیمکی!

او کیم‌دیر گؤزلرین‌ده

گئجیاری اوتوروب سیقارئتین توستوسویله

شهری دومانا بورویور...

او کیم‌دیر نفس چکدیکجه

گمی یئلکه‌نلری هاوالانیر...

باکی گئجه‌لری سویوق اولور...

آدینی اوسومه چکیرم.

اووجوم دولو قلپه‌لرله...

...یئنه هسرت،

یئنه هسرت،

یئنه هسرت!