کولت. آذ "سئچیم" آدلی حکایه‌نی تقدیم ائدیر:

او کیشی مئشه‌ده، منه ساری گلنده، جانیم اورپشدی. لاپ جوانلیق چاغیم ایدی. بیر آز منه باخاندان سونرا اورا-بورامی اَلله‌دی، ائله‌بیل اوره‌یینه یاتمیشدیم.

دوزون ایسته‌سز مئشه‌ده قالماقدان یورولموشدوم. ائشیتمیشدیم بورادان آپاریلانلار یاخشی یئرلره چیخیرلار؛ مکتب‌لرده قاراتاختا، گؤزللرین قارشیسیندا میز، ائولرده پئنجره، یا اوشاقلارین الینده قلم ، هامیسی بیر آن بئینیمدن کئچدی. دویغولاندیم.

کیشی ایتی بالتاسینان جانیما دوشنده، خوش گونلری دوشونه‌رک، آغرییا دؤزوردوم.

یارییاجان کسیلمیشدیم، بیردن اَل ساخلادی. گؤزون اورا بورا دولاندیریب، بیر نئچه آددیم یئرییه‌ندن سونرا باشقاسینی کسمه‌یه باشلادی.
وای یازیق جانیم، کیشی، منیم نه‌ییمی بَیه‌نمه‌دی. بَیه‌نمه‌یه‌جکدی، منی نییه یارالادی.

اونو کسیب گؤتوروب گئتدی، من ده یارالی قالدیم.

ایندی، بئله جاوان چاغیمدا یاواش یاواش اؤلوشگه‌ییرم، قورویوب آرادان گئتمه‌لی‌یم.