کولت. آذ "مولا نصرالدین حیکایه‌لری" سیلسیله‌سین‌دن "فیل" اؤیکوسونو تقدیم ائدیر:

دئیرلر، امیر تیمور اوردوسوندا فیل ده ساخلارمیش. فیل‌لر آیری-آیری کندلره گونده‌ریرمیش کی،اوردا ساخلاسینلار.
فیل‌لردن بیرینی ملا نصرالدین اولان کنده گونده‌ریر.
امیر تیمور قورخوسوندان کیمسه فیله توخونموردو. فیل کئیفی نه ایسته‌ییر ائله‌ییر، اکین-زمینی، باغ-باغاتی، بوستان یئییب پوزوردو.
کندلی‌لر فیلین الیندن لاپ تنگه گلیرلر، اونلار ییغیلیب ملانین یانینا گلیرلر:
-آی ملا، بو فیل بیزده ایستراحت قویمادی، گل قاباغا دوش. امیرین یانینا گئدک، دردیمیزی اونا دئیک، بلکه بیر رحمی گلیب، فیلی آپاردی.
ملا راضی اولور. اونلار امیر تیمور یانینا یولا دوشورلر. یولدا کندلی‌لر امیر تیمور قورخوسوندان ایکی‌بیر-اوچ‌بیر قاچیب داغیلیرلار. امیر تیمور قاپیسینا چاتاندا ملا باخیر کی، هاممی قاچیب، تکجه اوزو قالیب، اوز-اوزونه دئیر:
-یاخشی، گورون سیزین باشینیزا نه اویون گتیره‌جه‌یم. امیر تیمور اوندان سوروشور:
-ملا، نه اوچون گلمیسن؟
موللا دئیر:
امیر ساغ اولسون، بیزیم کنده بیر فیل قوناق گوندرمیسن. بوندان چوخ راضی‌یق. آنجاق فیل تک اولدوغوندان سس-کویدندن دایانا بیلمیریک. کندلی‌لر ده منیمله گلمیشدی، جسارت ائلیب ایچری گلمه‌دیلر.خواهیش ائدیریک بیر دیشی فیل ده گونده‌رسن.
امیر تیمور ملانین سوزوندن خوشو گلیر، اونا چوخلو انعام وئریر، امر ائله‌ییر کی، او کنده بیر دیشی فیل ده گوندرسینلر.
ملا دا آلدیغی هدیه‌لری گوتوروب سئوینه-سئوینه ائوبنه گلیر. کندلیلر اونو گوروب سوروشورلار:
-ملا نه اولدو؟
ملا جواب وئریر:
-گوزونوز آیدین، فیلین اوبیری تایی گلیر؟!