کولت. آذ گونئی آذربایجان‌دا ۱۹۶۰-جی ایلده و داها سونرا دوغولوب بویا-باشا چاتمیش و صنعت‌ده اؤز سؤزونو دئمیش گونئی شاعرلرینین آراسین‌دا هئچ بیر فرق قویمادان، اینجه و هسساس روحلارینا توخونمادان، یاراتدیقلاری محتشم پویزییا اؤرنکلرینی اینجه‌له‌مه‌دن اونلارین آنا دیلین‌ده فرق‌لی ژانر و اوصلوبلاردا قلمه آلدیغی شعیر و پوئمالارا، یاخود دا همین اثرلردن معین حیصه‌لره یئر وئریر.

فرانک فرید ایپک

۱۹۶۱-جی ایلده تبریزده دونیایا گؤز آچیب. ایبتی‌دای و اورتا مکتبی تبریزده بیتیریب. عالی تحصیلینی ایکی ایختیصاص اوزره - "لابوراتورییا علملری" و "اینگیلیس دیلی دیلمانج‌لیغی" بؤلمه‌سین‌ده باشا چاتدیریب. ۱۹۸۵-جی ایلده‌ن اعتباراً اجتماعی-مدنی و قادین حقوقلاری ساحه‌لرین‌ده آکتیو فعالیته قوشولوب. ادبیات‌دا شئیر، نسر، ترجومه و تنقید ساحه‌لرین‌ده اثرلری ایله اؤز پارلاق صحیفه‌سینی یازیب. ۱۹۹۸-جی ایلده تشکیل اولونان بیرینجی شیمالی-غرب ژورناللار فئستیوالین‌دا "آنا" آدلی شعیری ایله بیرینجی یئری توتوب. ۲۰۰۴-جو ایلده‌ن درج اولونماغا باشلایان "دیلمانج" ژورنالین‌دا قادینلارلا باغلی اؤزل سایلارین باش رداکتورو وظیفه‌سین‌ده ایشله‌ییب. "یوخودا آییلماق" و "جیزیق" آدلی ایکی شئیر توپ‌لوسو چاپ ائدیلیب.

سن سین‌سان

یا سن سین‌سان
دونیانین یوخولو قابلاری
بیر داها گرک گرنشه؛
سنین تیکه‌لرین
یئنی‌دن
اونلارا یئرلشه...
باخ!
آینانین سینیقلارین‌دا
پارچالانمیش تکرارا
تزه‌لنمیش آداملارا!

سینماق دا سینامالی ایمیش
بارماقلاریم کسیل‌سه بئله؛
بوتون یارالار بیتیش‌دی بلکه
اؤپوشلرینله!
سولاشیر، آینا
آیینلاشیر، سو
سن ایسه آیدینلاشیرسان
اوچوزده
من ایشیقلیغا چیخیرام!
گلین آپاریرلار

ائو-ائشیک آدینا
آپاریلدیم
ائشیک‌سیز ائوه، کئشیک!
گؤزللشدیکجه گؤزلریم سولانیر
قاماشیر گؤزلریم، قاشلاریم آلینان‌دا
اورییمین بن‌دی قیریلیر
اوزومه بند سالینان‌دا
بویونباغی آلینیر، من آلینان‌دا!

کفه‌ن‌دن دئییلیر
گلین‌لیگی‌می گئیه‌ن‌ده،
بوغازیم گؤینییر
بارماق دولو بال یئیه‌ن‌ده!
اوزوم‌ده قیزاریر
قیزلیغین قیرمیزی آلماجیغی
باشیما النیر
قندین قوندارما شیرین‌لیگی.
بارماغیما هلقه تاخیلیر
قولوما دستبند
- کئچمیش‌دن آنیلان "قولباغی" -
یوللان‌دیریرلار:
علی خینالی
بئلی باغلی.
بیر - اینه، بیر - اینه
تیکیلدیم تخته
"بخت" دئیه -دئیه؛
آپاریلدیم او گئجه
ائو-ائشییمه.