کولت. آز شاعر نوسرت کسمنلینین حیات یولداشی رهیله خانیما حصر ائتدیی مؤهتشه‌م "اعتراف" شئیرینی تقدیم ائدیر:

فیکیرلی گلیرم، دالغین گلیرم،
قایغی‌لی گؤزلرین چکیر شک‌لی‌می.
بزه‌ن گئج گلیرم، یورغون گلیرم
بیتیرسن قاپی‌دا بنؤوشه کیمی…

بلکه مین سوچومو بیل‌می‌سه‌ن منیم،
بیرینی اوزومه وورمامی‌سان هئچ.
ائیهاملا اوزومه گول‌موسه‌ن منیم،
بیرجه یول اوزومه دورمامی‌سان هئچ.

هر کس تالئییله گلیر حیاتا،
دئمیرم، اوریی یومشاق اولموشام.
دجل اوشاقلارا مولاییم آتا،
سنینچون ان دجل اوشاق اولموشام.

سن‌سه‌ن داغلار کیمی صبرله دؤزه‌ن
بلکه ترددودله چوخ دؤیوش‌موسه‌ن.
ایستی بیر سئوگی‌دن یازمیشام بزه‌ن،
سویوموش چایی‌می سن دییش‌می‌سه‌ن…

اوزوم‌ده کدردن بیر ایز گؤره‌ن‌ده،
شیرینیم اولموسان، آجیم اولموسان.
قوهوم‌دان، تانیش‌دان پیس اوز گؤره‌ن‌ده
سن آنام اولموسان، باجیم اولموسان.

بیر کؤورک شئیریم‌دن گؤزلرین دولوب،
نه دئییم، اؤزگه‌دن چوخ یازیب قله‌م.
نه قدر دویون‌لو گونوموز اولوب،
دویون‌لو قاشینی گؤرممیشه‌م من…

بیر علین متبخ‌ده قاب‌دا-قاشیق‌دا،
بیر گؤزون ایستی‌ده، توستوده اولوب.
بیر علین بئشیک‌ده اوغول-اوشاق‌دا،
بیر گؤزون همیشه اوستوم‌ده اولوب.

یوللار چارپاز-چارپاز، یوللار قاریشیق…
گئجه یول گئدیرم قولاغی سس‌ده.
بیزیم پنجره‌دن سوزوله‌ن ایشیق –
گؤزومون نورودور یولومون اوسته.

فیکیرلی گلیرم، دالغین گلیرم،
قایغی‌لی گؤزلرین چکیر شک‌لی‌می.
بزه‌ن گئج گلیرم، یورغون گلیرم
بیتیرسن قاپی‌دا بنؤوشه کیمی…