کولت. آذ اوستاد شهریارین شعیرینی تقدیم ائدیر:

بار ایلاها سن بیزه وئر بو شیاطین دن نجات

اینسانین نسلین کسیب ، وئر اینسه بو جین دن نجات

بیزدن آنجاق بیر قالیرسا ، شیطان آرتیب مین دوغوب

هانسی رؤیا ده گؤروم من ، بیر تاپا مین دن نجات؟

بئش مین ایلدیر بو سلاطینه گرفتار اولموشوق

دین ده گلدی ، تاپمادیق بیز بو سلاطین دن نجات

بیر یالانچی دین ده اولموش شیطانین بیر مهره سی !

دوغرو بیر دین وئر بیزه وئر بو یالان دین دن نجات !

هر دعا شیطان ائدیر ، دنیا اونا آمین دئییر !

قوی دعا قالسین ، بیزه سن وئر بو آمین دن نجات !!؟

ارسینی تندیرلرین گوودوشویلاریندا اویناییر

کیمدی بو گوودوشلارا وئرسین بو ارسیندن نجات ؟

یا کرم قیل ، کینلی شیطانین الیندن آل بیزی

یا کی شیطانین اؤزون وئر بیرجه بو کین دن نجات !!

اؤلدورور خلقی ، سورا ختمین توتوب یاسین اوخور

بار ایلاها خلقه وئر بو حوققا یاسین دن نجات ؟!

دینه قارشی ( بابکی – افشینی ) بیر دوککان ائدیب

بارایلاها دینه ، بو بابکدن ، افشین دن نجات

( ویس و رامین ) تک بیزی رسوای خاص و عام ائدیب

ویس ده اولساق ، بیزه یارب بو رامین دن نجات

شوروی دن ده نجات اومدوق کی بیر خئیر اولمادی

اولماسا چای صاندیقیندا قوی گله چین دن نجات

من تویوق تک ، اؤز نینیمده دوستاغام ایللر بویو

بیر خوروز یوللا تاپام من بلکی بو نین دن نجات ؟!

« شهریارین » دا عزیزیم بیر توتارلی آهی وار

دوشمنی اهریمن اولسون ، تاپماز آهین دن نجات