دئیرلر، بیر شاهین زولاقلی اولاغی (گورخر) وار ایدی.

بو اولاق چوخ مینمه‌لی ایدی. اؤلکه‌یه گلن هر وارلی قوناق و سفیر بو اولاغا بیر آز یونجا وئریب مینردی.... داها شاهین یونجاسینا احتیاجی قالمامیشدی. ائله اولموشدور، بو اولاق شاها یاواش ـ یاواش جوت‌تپیک آتیردی و اونا مینیش وئرمیردی.
شاه گؤروردو، بوتون غریبه قوناقلارا مینیش وئرن بو اولاق دوزلمه‌یه‌جک، هم ده گلن قوناق شاهدان سونرا بو اولاقدان سوراق توتور، شاه یاددان چیخیب....

آرتیق بو اولاق قوجالیر و هئچ کیمه مینیش وئره بیلمیر، یعنی گوجو قالمیر.
شاه بو اولاغی مئشه‌یه بوراخیر...

اولاق مئشه‌ده گئدرکن، بیر آج‌ جاناوار بونو گؤرور: دیشیلرینی بیر-‌بیرینه قیجایاراق دئییر: هه، چوخدان زولاقلی اولاق اتی یئمه‌میشم....

جاناوار اولاغا یاخینلاشاندا قوجا اولاق دویوق دوشور (حیس ائدیر). قاچماق ایسته‌سه ده، آرتیق جوان اولمادیغینی یادا سالیب، عاغلینی ایشه سالماغا باشلاییر...

«کئشکه بو جاناوار آرتیق‌طاماح اولاردی» - دئیه، دوشونوب، جاناوارا سالام وئریر:

سالام،آی جاناوار قاغا، سن نه گؤزلسن، نه عاغیللی جاناوارسان! اولاق قاغان سنه بیر قوللوق ائتمک ایسته‌ییر...

جاناوار دئییر: یوخ منه قوللوق لازیم دئییل، من ایندی آجام. سن بیلمیرسن، منیم شؤهرتیم هر یئره یاییلیب، سن منه هانسی قوللوغو ائده‌جکسن؟!

اولاق دئییر: من شاهین الیندن قاچمیشام، منی سارایا گلن شاهلار، سفیرلر، قوناقلار مینردی... اونا گؤره منیم نال‌لاریم قیزیلدان‌دیر... سن منی ائله یئیه‌جکسن... یاخشی اولار، نال‌لاریمی چیخاریب، اونلارلا 20 دنه یا زولاقلی، یا دا زولاقسیز قودوق آلاسان... نییه قودوق اتینه دیشین باتماز؟!

جاناوار بونو ائشیدن کیمی، دئییر:
سن نه یاخشی اوقلاقسان! سنی منه تانری یئتیریب...

اولاق دئییر: ایندی گل یاخینا، بو دال آیاقلاریمداکی قیزیل نال‌لاری چیخار. جاناوار قاغا آغزینی یاخینلاشدیراندا اولاق قاغا بیر جوت تپیک وورور، ‌جاناوار قاغانین آغیزیداکی بوتو دیشلری تسبئح دنه‌سی کیمی یئره سپیلیر...

قوجا اولاق قاه‌ـ‌قاه چکه‌رک جاناوارا بیر باخیب، سونرا قاچیب گئدیر....

بو آرادا بیر بوزقورد اورادان کئچیردی، جاناوارین دیشلرینی یئرده‌ سریلی گؤروب دئییر:

آی طاماحکار جاناوار، دیشلرینه نه اولوب، نه زاماندان آغزینا دستمال باغلاییبسان؟!

جاناوار دئییر:

آی بوزقورد قارداش، پئشه‌می ده‌ییشیب نالبند اولاندان آغزیمی دستمال ایله باغلامیشام...

بوزقورد ایشی سئچیب، دئییر: سنه دئمه‌ییبلر، یالانچی طاماحکاری آلدادار!