_خانیم هورمون‌لاریز چئک اولمالی‌دیر.

_یانی نمنه؟

_هورمون بدنیمیزده بعضی ایش‌لری گؤرن شئی‌لر.

_هورمونون نه اولدوغونو بیلیرم. نییه چئک اولمالی‌دیر؟

_جینسل هورمون‌لاریز آشاغی یوخاری اولابیلر. منجه قادین هورمونو سیزین بدنیزده آشاغی‌دیر. ائستروژئن، پروژئسترون...

_سن ائله بیلیرسن که سندن سونرا کیمسه بونلارین نه اولدوغونو بیلمیر؟

_من هئله بیر شئی ادعا ائله‌مه‌دیم. تکجه دئدیم کی قادین هورمونو سیزین بدنیزده آز اولا‌بیلر. نیگارانچیلیغی دا یوخدور. ایینه داواسی وار.

_من نه اولدوغومو بیلیرم. ایینه داوادا مریض آدام‌لارین‌دیر. ائستروژئن پروژئسترونوم زادیم آز دئییل. من قادین اولدوغوما یقینیم وار. بزه‌نیب کیشی‌لرین دیققتینی چکمه‌یی باشاریرام.

ایاغا قالخدیم، چانتامی میزین اوستوندن گؤتوردوم. قاپی‌نین قاباغیندا قیچیم بورخولدو. قاپی‌نی دالیمجان چیرپدیم.

ادیک دابان گئیسم ده، گئنه اؤزومو یئرییه‌نده اؤردک کیمی حیس ائدیرم، سانکی آددیم آتارکن بوینومو دال قاباق ائدر کیمی.

من سئویلمک ایسته‌میردیم. ائستروژئنیمین آز اولماسینا متهم اولدوم. سفئح آرواد بیر سنین ائستروژنین چوخدور، بیده ننه‌وین.
خیاوان‌دا سوروجو باشینی پنجره‌دن چیخاردیب باغیردی:

«خانیم چیراغا باخ کئچ دای!» دینمه‌دیم. بیر آیریسی دا او الدن گلیردی. باشیمی یوخاری قووزامادیم، خیاوانی باشی آشاغی کئچدیم. او آرواد قویون کیمی داوراندیغی یئرده، ندن من قویون کیمی خیاواندان کئچه‌بیلمه‌یم؟

اخیردا وساییل آلاجاقدیم. توکاندا ور وسایلی بیر بیر گؤتوروب، ووروردوم قولتوغوما. کارگر منه طرف گلدی: خانیم بونون ایچینه قویون آلدیقلاریزی.

«ایسته‌مز» دئدیم.

_آخی راحات اولمورسوز بئله ده.

چیغیردیم : «ایسته‌میرم راحات اولام».

تزه روژومو آتمایاجاقدیم کی ائو وسایلی‌نین ایچینه! آنامین گؤزوندن ایراق! سئچیب گؤتوردوم، قیپ قیرمیزی‌سینی، دریمه هر نه‌دن داها دا چوخ اویان رنگ.

ائوه ساری سورعتله یئریمه‌یه باشلادیم.

دابانیم اینجیدیردی. چانتامدان راحات باشماق‌لاریمی چیخاردیب ده‌ییشه‌ندن سونرا زیپینی چکیب قوجاغیمدا توتدوم. بئلیمدن آسلانسایدی، قاچارکن آتلانیب دوشردی، بئلیمه چیرپیلاردی. فیکریم قالمیشدی روژدا. اوزومه چوخ دوشه‌جکدی، بیلیردیم. اوندان قاباق دا نئچه سئری بو رنگی وورموشدوم‌. اؤزو ده اولماسایدی، اونا اوخشار رنگ ایدی. آنامینکی دا بوندان ایدی. اؤزو ائوده اولمایاندا اوتاغیندان گؤتورردیم. دیبینده قالمیش روژو ناشی‌لیقلا دوداغیما چکه‌نده، دوداغیمی جیزاردی. اوزدن گئتمزدیم. روژلو دوداق‌لارلا آینادا اؤزو اؤزومه دانیشاردیم، گؤزل‌لییمی کشف ائتمه‌یه باشلادیغیم گون‌لریم ایدی.

ائوه یئتیشدیییمده، پالتارلاریمی چیخارتمادان اوتاغیما گئتدیم.

"هانی به تاپشیردیقلاریم، گئنه یادیندان چیخدی هه؟" آنام همشه‌کی کیمی سوال جوابا چکیردی.

«گلیرم» دئدیم. «آلمیشام».

چوخلو گؤزلری اؤزونه چکه‌بیله‌جک بیری اولدوغوما رغمن سئویلمک ایسته‌میردیم. بیرینین طرفیندن سئویلدیییمی حیس ائتدیییم آن بدنیم بیر یئره بند اولموردو، اؤزونو قفسدن چیخارتماق ایسته‌ین کیمی چوبالاییردی. بوغازینا باغلانان ایپی آچیب قاچماق ایسته‌ییردی. سئومک سئویلمک‌دن داها راحات‌دیر. سئون سن اولاندا، ایپی بویونا سالان دا سن اولورسان. "سنی سئویرم"ی دیلینه گتیریرسن. سونرا دا او آدام قالیر، بوینونداکی او ایپ‌له. بو جومله‌نی هر گون تیکرار ائله‌دیکجه ایپی قالینلادیرسان. بوینونا دارالدیرسان. بیر گون سئوگی دیبه چاتیر، الینه گولو وئردییینده، هر شئی یئرینده اوتورور. سنین اسیرین اولان آدام‌دا دؤزوم قالمیر. ایکی اللی بوینونداکی قالین ایپدن یاپیشیب، گوجلو گوجو ایله قیریر.

روژومو سیلدیم. آنامین یانینا گئتمک زوروندا قالماسایدیم آینانین قاباغیندان چکیلمه‌یه‌جکدیم. روژو سیلمه‌سه‌یدیم اؤز بوینوما ایپی سالاجاقدیم.