کولت. آذ آذربایجانین گؤرکملی شاعری مممد آرازین "بیز نییه بو گونه دوشدوک آی دده؟!" آدلی شعیرینی تقدیم ائدیر:
⁦
قورخوم یوخ هئچ نه‌دن، قورخوم وار حاقدان
قورخورام حاق بیزه آرخا چئویره
خالق اؤز غضبینی گیزله‌یه خالقدان
خالق اؤز غضبینی خالقا چئویره
بیز نییه بو گونه دوشدوک آی دده؟!

بس هانی یوردداش‌لار آتاسی اؤلکه‌م؟
بیز گوموش دنیزلر ساحیلی‌ایدیک
سؤزوموز وار ایدی اؤتکَمدن اؤتکم
بیز قیزیل تاخت-ی-تاج صاحیبی ایدیک
بیز نییه بوگونه دوشدوک آی دده؟!

گولشنی پای اومور، بیر گول اَکمه‌ین،
بئله دونیاگیره دونیا آز اولار.
عؤمرونده آیاغی یئره دَیمه‌ین،
یئر گزیر، یئر قورا، یئرلی‌باز اولا.
بیز نییه بو گونه دوشدوک آی دده؟!

تاماه وار داش کسن میشاردان ایتی
گؤدَن وار بیر قارا یارغاندان درین
یاخشی دا، یامان دا بیر شومدا بیتیر
اعلاسی تئز سولور یاخشی گونلرین
بیز نییه بو گونه دوشدوک آی دده؟!

دورو گؤیوموزه کیم کول آتدی، کیم؟
کیم حاققا اوزانان ال‌لری کسدی؟
آتالار قبرینه باش اَییب دئییم:
«بیزیم دونَنیمیز اؤرنَک‌دی، درس‌دی»
بیز نییه بو گونه دوشدوک آی دده؟!

هارداسا تانرییا آغ اولدوق یقین
هارداسا شیطانی باشا چیخارتدیق
هارداسا یوکونه یوک اولدوق غمین
هارداسا دوز یولو داشا چیخارتدیق
بیز نییه بو گونه دوشدوک آی دده؟!

سن چوخدان دئمیشدین: «گوج سایدا دئییل
ییغما دوز طرَفه دوز اولمایانی!»
ایندی بو چوخوللوق دؤیوشدو دئییم؟
سئچک بیز اولاندان، بیز اولمایانی
بیز نییه بو گونه دوشدوک آی دده؟!

نیشانچی اؤزوموز، هدف اؤزوموز
بئله‌سه چوروموش دیره‌ییک بئله
بیر سوفره باشیندا، ایکی سؤزوموز
بیر اولا بیلمیرسه، تا نه‌ییک بئله؟
بیز نییه بو گونه دوشدوک آی دده...!؟