کولت. آز قاسم نوربخشین "منده بیر آینا وار او دا ائلیمدی" آدلی شئیرینی تقدیم ائدیر:

منیم یاشاماغیم، یاماج آشاغی
تزه دنه دولان، گؤی سونبوللردی
منیم اومودلاریم، گون باتان چاغی
سحردن دان ایچن، کؤرپه گوللردی

قارتلسا دا زامان، وئجیمه دئییل
سوسمارام شهرین، توتقون چاغیندا
گولخانادا آچمیش یاشیل بوداقدا
قوش اوللام اوخورام، حیات باغیندا

هله‌ ده آنامین لای لالاریندا
شعرین بوداغیندا، آلما اوخورام
قورو بنؤوشه‌لر کیتابلاریمدا
قیزیل گول کولوندا، یووا توخورام

منده اومودسوزلوق، ایللردی اؤلوب
بولودا باخاندا، شعریم سئوینیر
بئتون دووارلارا، قارشی چیخاندا
سارماشیق اوره‌گیم، گؤیه دؤیینیر

منده سئوگی بیتیر، منده یاز بیتیر
منده سایسیز مئشه، قوتاران دئییل!
اؤلسم ده قانیمدان یاشیللیق آچار!
قیشدا قار چیچگیم، بوز دونان دئییل

دوداغیمین گولو، دیلیمین بالی
هله آنادیلی، یازلاندیراجاق
گؤزو گؤتورمه‌ین، پاخیر دئییشی
آخار شعرلریم، پاسلاندیراجاق

ووقارین دیده‌جک، قوزغون دا اولسا!
من ال چکنمه‌رم، ایلقارلاریمدان
وفاسیز، ویجدان‌سیز یاشایانمارام
وارلیغیم، تؤره‌نیب ووقارلاریمدان

خالیص قیزیل‌لارین، کانی منده‌دیر
قوتارماز جواهیر، قایناقلاریمدا
اورکلر قاشینی، تاخا بیلمرم
ساتقین اوزوکلره، جایناقلاریمدا

منده بیر آینا وار، او دا ائلیمدی
غزللی تؤره‌دیب اؤزه للیگیمی!
دونیا قیشا دؤنسون من بیر باهارام
فلک سولا بلمز، گؤزه للیگیمی!