چوخداندیر بیر حیکایه‌نین اوستونده فیکیرلشیرم:

بیر شهره ویروس گلیر، آدام‌لار بیر صاباح یوخودان قالخدیقلاریندا، اؤز دیل‌لرینی اونودورلار. هامیسی باشقا دیلده دانیشما، باشقا دیلده یازیب اوخوما ویروسونا دوچار اولورلار.

اول‌لر تعجوبه دوشورلر، ولی اؤزلری ده دقیقن ندن تعجوب ائتمه‌لرینین عیللتینی بیله‌بیلمیرلر، چونکو آرتیق اؤز دیل‌لرینده دانیشماغی، یازماغی، اوخوماغی باجاران بیریسی یوخدور آرالاریندا...

گئتدیکجه تعجوب ائله‌مه‌یی ده اونوتماغا باشلادیقلاری سیرالاردا آیری اتفاق‌لار دوشور...

حیکایه‌یه بیر راوی آختاریرام، راوی‌لر ده بو ویروسا بولاشیب‌لار.

راوی‌نین یئرینه اؤزوم روایت ائله‌مه‌یی بوینوما آلیرام. الیمی بوش هاوایا قووزاییب باغیریرام، کاراکترلردن منه باخان، سسیمی دویان یوخ.