کولت. آز آذربایجانین گؤرکه‌م‌لی شاعری توفیق بایرامین "قادین اوریی" آدلی شئیرینی تقدیم ائدیر:

نئجه رحم‌لیدیر، نئجه آمان‌سیز،
نئجه مهریبان‌دیر قادین اوریی!
سن اونو سیندیرسان، بیل کی، آ قان‌سیز،
آغلایان کامان‌دیر قادین اوریی.

گولدورسن، عمورلوک سعادتیندیر،
سؤندورسن، یانماغی بیر ده چتین‌دیر.
او، اصل قایغینین، محبتین‌دیر،
سئوگی‌سیز زیندان‌دیر قادین اوریی.

داشی دا اریدر، داش دا اولار او،
اریییب گؤزلرده یاش دا اولار او.
باهار دا اولار او، قیش دا اولار او،
داملادیر، عمان‌دیر قادین اوریی.

اونونلا دونیادیر سنه قفس ده،
اونسوز هئچ یاشاما بو تورپاق اوسته.
سئوه‌ن بیر اور‌یه آخیر نفس‌ده
ان گؤزل درمان‌دیر قادین اوریی.

اونو آلچال‌دان دا، اوجال‌دان دا بیز،
درد وئریب، وعده‌سیز قوجال‌دان دا بیز.
قدرینی بیلنده بو جهان‌دا بیز،
همیشه جاوان‌دیر قادین اوریی.

بعضا گول تک سولار آجی بیر سؤزدن،
آغلایار خلوتی، گولسه ده اوزدنئ
بعضا اوشاق کیمی بیر اورکسیزدن
محبت اومان‌دیر قادین اوریی.

بیر نامرد الین‌دن زهر ایچ‌ن‌ده،
کئچیرر اؤمرونو او، یاس ایچین‌ده.
بعضا ان قیمت‌لی لباس ایچین‌ده،
ناله‌دیر، فغان‌دیر قادین اوریی.

سن‌سیز ال چکرم آرزودان، کامدان،
نه چیخار سئوگیسیز-سنسیز ایلهام‌دان؟
اینجیتسن، دؤزره‌م، توفیق بایرامدان
اینجیمه، آماندیر، قادین اوریی!