آنا صحیفه ادبیات |
کولت. آذ گونئیلی شاعره همیده رئیسزادنین "وطن ساخلا منه" آدلی شعیرینی تقدیم ائدیر:
یئنه نیسگیل لچهیین سالدی خزان
آچمامیش غؤنچهلری چالدی خزان
منی ده جایناغینا آلدی خزان
یاشیل احساسلی چمن ساخلا منه!
یالانا دوزلوق اوخو، ائتسه اثر،
گول بیتیب غؤنچه گولوب آچسا سحر،
بیرده گؤرکملی اورک گؤرسون اگر،
او اورکلرده وطن ساخلا منه!
سؤزلرین سینهلره کؤز قالادار
دویغونو توشگولو کؤزدن جالادار
اونداکی سؤز گونشی چالخالادار
سؤزده اولدوز کیمی دن ساخلا منه!
دایاق عونوانلی داغ آوارهسییم
قارا گونلرده آغ آوارهسییم
بیر گولوشلوک دوداق آوارهسییم
غملره قارشی گولن ساخلا منه!
دئمیرم خوشلوغا یاد ائت، یادا سال،
غم اؤنونده آدیمی فریادا سال،
منی ده، غم بؤلوشنده آدا سال
بیر اورک پایلی مُحَن ساخلا منه!
بیر دایان، ذیروهیه دیز قوی! گلیرم
سانماکی خستهیم ایز قوی! گلیرم
بیر چاناق سؤزده دنیز قوی! گلیرم
بیر دؤیوش مئیدانی چن ساخلا منه!
اوجالیقلاردا ایزین وار دئیهرک
چیخارام داغلارا یار-یار دئیهرک
گلرم، غوربت ائوین دار دئیهرک
وطن عونوانلی کفن ساخلا منه...!
تاریخ
2020.03.11 / 21:41
|
مولف
Axar.az
|