چوره‌کچی‌یه پولو وئره‌نده بارماغیمیزین اوجو بیربیرینه دَییر، تئز ال‌لریمیزی چکیب اوزاقلاشدیریریق. چؤره‌یین بیر گوشه‌سیندن توتوب یاپیشیرام، گؤزومله نیشانه قویورام، ائوه یئتیشه‌نده دوز الیم دَین یئری کسیب اَینه آتاجاغام. چؤره‌یی قاباقجادان صندلین اوستونده حاضیر آچدیغیم روزنامه‌یه بوکورم.

قاپی‌نین قاباغیندا سیوئجی جیبیمه قویورام، هاچارلا قاپینی آچیرام، نایلون الجک‌لریمی چیخاردیب قاپی‌ قاباغینداکی آشقال دولونا آتیرام، بیر الیمله دستگیره‌نی بورارکن اوبیریسی ایله چؤره‌یی توتورام. دیرسه‌ییمله قاپی‌یا فیشار وئریرم.

هالین قاپیسینی آچجاق سیرفایا طرف گئدیرم، چیراغی یاندیریرام، دستگیره‌دن یاپیشیرام، چؤره‌یین الیم دَین تیکه‌سینی سیرفادان ائشییه قویورام. مستقیم توالته گئدیرم، الیمی ایستی سو ایله صابین لا مؤحکم اووکالاییرام. چیراغی سؤندورورم، دستگیره‌دن توتوب آچیرام. اوزومو یادیمدان چیخیب یووام، تزه‌دن توالته قاییدیرام، ایستی سویو شاببیلتی ایله اوزومه چیرپیرام.

آلکول قابینی میزین اوستوندن گؤتورورم. پریزلردن باشلاییرام، سو شیرینین باشی، توالتین گیره‌جک و چیخاجاق دستگیره‌لری، هالین چیخاجاق و گیره‌جک دستگیره‌لری، سونرا حیه‌ط قاپیسی، داها سونرا اصلی قاپی، اورداکی پریزلر، ماشینین دستگیره‌سی.

بیربیر بارماق‌لاریمی آلکول‌لاییرام، الکول‌لو الیمی اوزومه، سونرا سیوئجین، دسته کیلیدین و آلکول شوشه‌سینین اؤزونون اوستونه چکیرم. چؤره‌یی گؤزومله نیشانه فویدوغوم یئردن کسیرم، قاباقجادان حاضیرلادیغیم موشامبایا آتیرام.

آشپازخانادان دملی چایین، تزه چؤره‌یین عطری دولور بورنوما، دریندن نفس آلیب آغ جییرلریمی تزه هاوا ایله دولدورورام، هاوانی چوخ سینه‌مده ساخلایابیلمرم، نئچه ثانیه‌دن سونرا کؤهنه‌له‌جک، چؤله قایتارمالی‌یام. بو حیاتین اییسی‌دیر، هر شئی دوز یولوندا گئتسه بیر گون داها آرتیق یاشاماق فورصتیم وار.

چؤره‌کچی چؤره‌یین هانکی گوشه‌سیندن یاپیشمیشدی؟ تیکه‌نی آغزیما طرف آپاراندا بونا فیکیرلشیردیم، تزه‌دن گئری قایتاریرام، تیکه الی دَین یئر اولسا نه ائله‌مه‌لی‌یم؟ دوروب تزه‌دن چؤره‌یی فئرده‌ قیزدیریم می؟ اوندا فئرین دسته‌سینی ده آلکول‌لامالی‌یام. ولی اوغلانین قیافه‌سی سالیم آدام‌لارا اوخشاییردی، جین‌ باش ایدی، کورونا توتان آدام اوجور اولماز! هه، کورونا توتان آدام چؤرک پیشیره‌بیلمز. هه، اوجوردور، انشالله اوجوردور.

ساعات دوققوز یاریم اولوب، آجلیق ییرتیجی حیوان کیمی جانیما دوشوب، بیر شئی‌لر یئییب ایچمه‌لی‌یم.