کولت. آذ سلیمان جودی (ثالث)نین "اوندا شیرین اولار بو حیات منه " آدلی شعیرینی تقدیم ائدیر:

پالاز اولام یوخسول ائوه سالینام
قیصاص اولام ظالیم لردن آلینام
بیر ساز اولام مجلیس لرده چالینام
اوندا شیرین اولار بو حیات منه

باهار اولام قیش قهرینی چکنه
قووت اولام خلقه روزی اکنه
مسلک اولام سینیق کونول تیکنه
اوندا شیرین اولار بو حیات منه

مژده اولام ایستکلی سی ایته نه
چشمه اولام سوسوز یرده بیته نه
چیراغ اولام ایشیق سالام وطه نه
اوندا شیرین اولار بو حیات منه

بیر اود اولام جهالتی یاندیرام
قانمایانی دوشوندورم قاندیرام
یول هانسی دیر ارکان نه دیر آندیرام
اوندا شیرین اولار بو حیات منه

گونش اولام هر نه بوز وار اریدم
بولبول اولام بایقوشلاری کیریدم
ریاکارین عؤمرون گونون چورودم
اوندا شیرین اولار بو حیات منه

جاهاز اولام یئتیم قیزا گلینه
عصا اولام قوجالارین الینه
داراق اولام باجیلارین تئلینه
اوندا شیرین اولار بو حیات منه

فرهاد کیمی چاپام اوجا داغلاری
باهار اولام گول لندیرم باغلاری
بیرلشدیرم قارالاری آغلاری
اوندا شیرین اولار بو حیات منه

آچار اولام قیفیل لانمیش دیل لره
مرهم اولام قابار چالان ال لره
جانلا باشلا قوللوق ائدم ائل لره
اوندا شیرین اولار بو حیات منه

یولداش اولام آرزوسونا چاتانا
اؤلوم اولام اوز یوردونو ساتانا
زندان اولام دوست آراسی قاتانا
اوندا شیرین اولار بو حیات منه

قانادلی قوش اولام گؤی لره اوچام
گئجه لر آی اولام یئره نور ساچام
بیر نفر دئمه یه چیلپاغام آجام
اوندا شیرین اولار بو حیات منه

جؤهر اولام ائل لر قانون یازالار
کولونگ اولام معدن لری قازالار
یایلاق اولام داریخانلار گزه لر
اوندا شیرین اولار بو حیات منه

قوناق گئدم اوزاق ائله اوبایا
ائل لر منی برکده بوشدا سینایا
یاخشی اولسام پیس ده اولسام تانییا
اوندا شیرین اولار بو حیات منه

هر یئرده وار اوچا ظولمون بیناسی
سیلاح لارین باتا سسی صداسی
گؤزل له شه یوردوموزون نوماسی
اوندا شیرین اولار بو حیات منه

قویام خوشبخت لیگین تمل داشینی
آغلایان گؤزلرین سیلم یاشینی
بوز دومان آلماسا داغلار باشینی
اوندا شیرین اولار بو حیات منه