کولت. آز زلیمخان یاقوبون "دؤیوشه‌ن تورک، اویانان تورک، قالخان تورک" آدلی شئیرینی تقدیم ائدیر:

آیاز ندیر، شاختا ندیر، بورکو نه،
نه قورخودار حاق یولون‌دا تورکو، نه؟
بیره دوشسون دوشمه‌نلرین کورکونه،
دنیز کیمی دالغالان، تورک، چالخان، تورک،
دؤیوشه‌ن تورک، اویانان تورک، قالخان تورک!

سیلکلدین گؤیون یئددی قاتینی،
قوجاقلادین دوغو ایله باتینی.
دور یهرله ار‌نلرین آتینی،
دنیز کیمی دالغالان، تورک، چالخان، تورک،
دؤیوشه‌ن تورک، اویانان تورک، قالخان تورک!

صاباحا باخ، عصر سنی گؤزلییر،
قالا سنی، قسر سنی گؤزلییر.
محکوم سنی، اسیر سنی گؤزلییر،
دنیز کیمی دالغالان، تورک، چالخان، تورک،
دؤیوشه‌ن تورک، اویانان تورک، قالخان تورک!

قیلینماسا باشیمیزین چاراسی،
سیلینرمی اوزوموزون قاراسی؟!
آلتای ایله آنادولو آراسی
دنیز کیمی دالغالان، تورک، چالخان، تورک،
دؤیوشه‌ن تورک، اویانان تورک، قالخان تورک!

دؤیوش‌ده‌دیر آغلین، هوشون یوللاری،
دؤیوش‌ده‌دیر اوچان قوشون یوللاری.
دؤیوش‌ده‌دیر قورتولوشون یوللاری،
دنیز کیمی دالغالان، تورک، چالخان، تورک،
دؤیوشه‌ن تورک، اویانان تورک، قالخان تورک!

اریت‌می‌سه‌ن ارینتک قار سودا
رومانی دا، بیزان‌سی دا، فارسی دا.
قالا کیمی تزه‌دن قور قارسی دا،
دنیز کیمی دالغالان، تورک، چالخان، تورک،
دؤیوشه‌ن تورک، اویانان تورک، قالخان تورک!

«گیلقامیش»دان، «آلپامیش»دان، «ماناس»دان
گئری قالماز داستان اولسون بو داستان.
قورتار بیزی بو هسرت‌دن، بو یاس‌دان،
دنیز کیمی دالغالان، تورک، چالخان، تورک،
دؤیوشه‌ن تورک، اویانان تورک، قالخان تورک!

هاردان هارا گئتدیینی بیله‌ن یول،
اوفوقلره قوووشان‌دا گوله‌ن یول،
آتیللادان آتاتورکه گلن یول،
قالخان اولسون باشین اوسته، قالخان، تورک!
چاناققالا، مالازگیردین داوامی،
تورک دئییل کی، اؤز قانین‌دان قورخان تورک!
تمیز سوددن مایالان‌سین، دوغولسون،
مئتئ کیمی، اوغوز کیمی بیر خان، تورک!
یادداشیم‌دا سیرالان‌سین، آنیل‌سین،
ارتوغرول بی، اوسمان قاضی، اورخان، تورک!
یئنه تانری داغلارینی قوجاقلا،
دنیز کیمی دالغالان، تورک، چالخان، تورک،
دؤیوشه‌ن تورک، اویانان تورک، قالخان تورک!