کولت. آذ میرزه علی معجز شبسترلینین "انشاء الله" آدلی شعرینی تقدیم ائدیر:

ساقیا آخر شعبان اولاجاق انشاء الله

رمضان وارد ایران اولاجاق انشاءالله

عید جمشید بو ایل نقل مکان ائیلیه جک

توتاجاق روزه مسلمان اولاجاق انشاءالله

شب نوروز خضاب ائیلیه جک مؤمن خاص

ساقالی مثل بادمجان اولاجاق انشاءالله

دوراجاق وقت اوباشدان ییه جک بوز باشی

چیخاجاق داما اذان خوان اولاجاق انشاءالله

ائیله کی قیلدی نمازی اوخودی تعقیبات

سویونوب پالتاری عریان اولاجاق انشاءالله

یوماجاق گوزلری، خورنا چکجک یوخلایاجاق

کرسی چادرشبی لرزان اولاجاق انشاء الله

ناگه اوغلان آییلیب ائیلجک آه و فغان

مرد دیندار او دم هراسان اولاجاق انشاءالله

او چیغیردیقجا دده قاش قاباغین تورشاداجاق

کیشی نین حالی پریشان اولاجاق انشاءالله

عورت آییلمایاجاق بس قاپاجاق یارماچانی

خانباجی قانینا غلطان اولاجاق انشاء الله

پیشه جک کوفته، کباب و تره ک و شیر برنج

مؤمنین رزقی فراوان اولاجاق انشاءالله

ییه جک نعمت بسیار، ایچه جک چای کثیر

شیشه جک معده سی باردان اولاجاق انشاء الله

ائیله کی باسدی کسالت کیشینی یوخلایاجاق

چکجک خورنا اوباشدان اولاجاق انشاء الله

گئده جک مسجده واعظ دییه جک جنتدن

عاشق حوری غیلمان اولاجاق انشاء الله

یا اوروجلوق اونو مرحوم ائده جک یا قوجالیق

آب کوثر ایچیب اوغلان اولاجاق انشاءالله

ساقیا ائیلمه غم ماه مبارک یئته جک

ماه شوال نمایان اولاجاق انشاء الله

عید جمشید بو ایل اولدو معصومه غلام

قورخما ساقی یئنه سلطان اولاجاق انشاء الله

ایکی ایلدن سورا بایرام قویاجاق باشینه تاج

وطن عاشقلری خندان اولاجاق انشاء الله

معجز اثبات وجود ائیلیه جک میکده ده

ایچه جک باده غزلخوان اولاجاق انشاء الله

ساقالیندان آخاجاق چاک گریبانینه می

باخاجاق خلق اونا حیران اولاجاق انشاءالله

دئیه جک بابیه قارداش دوتاجاخ گبرین الین

سیخاجاق شوقیله انسان اولاجاق انشاءالله