آنا صحیفه ادبیات |
کولت. آذ رسول رضانین "سئوگیلیم" آدلی شعیرینی تقدیم ائدیر:
دورنانین قاتاری گؤر نه قشنگدیر!
سحر بولودلاری نه لالهرنگدیر!
مهریبان گؤزلرین یول چکیر یئنه؛
بیر سس پیچیلداییر:
گلمهیهجکدیر
گئجهدیر، آی گلیب گزیر اوتاقدا،
قولاغین سسدهدیر، فیکرین اوزاقدا.
سئوگیلیم نه گؤروب عئشقین، سورسانا
قلبین اوتاغیندا تک آغلاماقدا؟!
اوزاق اوفوقلرده آل گونش باتیر،
کؤلگهلر دنیزه مین کمند آتیر.
هیجرانین گؤزلری اویاقدیر یئنه؛
نه گوندوز دینجهلیر، نه گئجه یاتیر.
حسرت تئللرینه کیمدیر ال ووران؟!
گؤیرچین کؤنلومدور یوللاردا دوران.
یوز ایللیک بیر عؤمرو قوربان وئرردیم،
خومار گؤزلرینه باخسایدیم بیر آن.
بیلیرم، صادیقسن آندا، ایلقار'ا
قوی چکمهسین فیکریم، کؤنلونو دارا.
او بؤیوک عئشقینله ساغالاجاقدیر؛
اینانکی آلدیغیم ان دَرین یارا.
اوخشا کؤرپهمیزی، دیک توت باشینی،
چاتیلمیش گؤرمهسین، دوشمن قاشینی.
نامردلر ایچیندن سوراغی گلمز؛
کؤنول همدمینین، جان سیرداشینین.
بلکه بیر گون، مندن گتیردی سوراق
قان لکهسی دوشموش بیر ساری یاپراق.
بیلکی، سون شئعریمین ایلک سؤزو سنسن؛
بیرده جان وئردیییم بو آنا توپراق.
تاریخ
2020.05.20 / 21:22
|
مولف
Axar.az
|